Бір кездері Қазақстанның барлық қиырынан өнер, білім іздеп ағылған аға буынға Алматыдағы Орталық демалыс және мәдениет паркін таныстырып жатудың қажеті жоқ. Алайда, осы қалада туып-өскен кейінгілердің көбі бұл саябақ туралы біле бермейді. Оның бір себебі, мұнда жастар үшін ойын-сауықтың басқа түрі көп болса, екіншіден, көп жылдар бойы күтім көрмей тұрған демалыс орнында серуендейтіндей түр қалмаған-ды. Таяу күндері қаладағы ең үлкен парк мүлкі коммуналдық меншікке қайтарылды.
Бір кездері Қазақстанның барлық қиырынан өнер, білім іздеп ағылған аға буынға Алматыдағы Орталық демалыс және мәдениет паркін таныстырып жатудың қажеті жоқ. Алайда, осы қалада туып-өскен кейінгілердің көбі бұл саябақ туралы біле бермейді. Оның бір себебі, мұнда жастар үшін ойын-сауықтың басқа түрі көп болса, екіншіден, көп жылдар бойы күтім көрмей тұрған демалыс орнында серуендейтіндей түр қалмаған-ды. Таяу күндері қаладағы ең үлкен парк мүлкі коммуналдық меншікке қайтарылды.
Биыл мамыр айының аяғында шаһар басшысы қазіргі күйі сын көтермейтін Орталық саябақты екі апта аясында ретке келтіруді талап еткен болатын. Екі апта түгілі екі ай өтсе де паркті демалыстың заманауи талаптарына сай ете алмаған меншік иелері саябақты муниципиалды меншікке қайтаруға мәжбүр болды.
Бүгінгі күндері қала әкімшілігі парк келбетін жаңа заман талғамына көтеру үшін жаңа тұжырымдама жасауды қолға алды.
Ал өткен аптада жалпықалалық сенбілікке орайлас келген осынау оқиға кезінде қала әкімі Ахметжан Есімов осындағы ағаш отырғызу рәсіміне қатысты. Веложарыс мәресі де осында өтті. Сенбілікке шыққан қалалықтардың көпшілігі Орталық саябақты қоқыстан тазартуға ықыластана қатысты.
Сенбілік кезінде Алматы әкімі Орталық демалыс және мәдениет паркі жекеменшіктен қайтарылғандығын жеткізіп:
– Бүгіннен бастап, паркке кіру тегін, біз Орталық паркті түгелдей жаңартып, ретке келтіретін боламыз. Жаңа ағаштар отырғызамыз. Келер жылы парк келушілерді жаңа келбетімен қарсы алатын болады, – деді.
Сол күні-ақ паркте 60 шырша, 500 жалпақ жапырақты ағаш отырғызылды.
Айнаш ЕСАЛИ,
«Егемен Қазақстан».
АЛМАТЫ.