Ресейде оқитын қазақстандық студенттер оқуын жалғастыру үшін ресейлік үкіметтен елге кіруге рұқсат беруді сұрады, - деп хабарлайды Egemen.kz.
Қазір пандемияға байланысты Қазақстан және Ресей шекарасы жабық тұр. Осы себепті барша студенттерге қашықтан оқу ұсынылған. Алайда студенттер қашықтан оқудың сапасы бәсекеге қабілетті болмайды деп отыр. Сондай-ақ медицина және шығармашылық бағытта қашықтан оқу мүлдем мүмкін емес делінген студенттер өтінішінде.
"Біз, ресейлік ЖОО студенттері, шекаралар жабық болғандықтан оқуымызға орала алмай отырмыз, кіруге рұқсат беруіңізді сұраймыз", - делінген өтініште.
Томск мемлекеттік басқару және радиоэлектроника университетінің студенті Екатерина Виниченконың айтуынша, хатқа оның мыңға жуық отандасы - қазақстандық студенттер қол қойған. Олар жатақханада киімдері мен ноутбуктері қалғанын айтады.