Нью-Йоркте шымылдығы түрілген АҚШ-тың ашық біріншілігінде бүгін кортқа шыққан Қазақстанның төрт теннисшісінің үшеуі екінші кезеңге жолдама алды, деп хабарлайды Egemen.kz.
Жүлде қоры 53 400 000 долларды құрайтын турнирде Александр Бублик сүреңсіз өнер көрсетіп, жарыс жолынан шығып қалды. Ол ұлыбританиялық Кайл Эдмундке 6:2, 5:7, 5:7, 0:6 есебімен есе жіберді. Ал өзге жерлестеріміздің барлығы да алғашқы айналымнан сүрінбей өтіп, өз жанкүйерлерін қуантты. Атап айтсақ, Михаил Кукушкин мажарстандық Аттила Балаждан басым түсті – 6:4, 7:5, 6:4.
Әлемнің 17 ракеткасы Елена Рыбакина WTA тізімінде 107 орында тұрған украиналық Катарина Завацкаяның тас-талқанын шығарды – 6:3, 6:0. Сол секілді Юлия Путинцеваға (33 ракетка) да америкалық Меган Монтгомериді жолынан ығыстыру еш қиындық туғызған жоқ. Есеп – 6:1, 6:3.
Кеше Зарина Диас АҚШ-тың өкілі Бернарда Перамен кездесті. Бүгін Елена Рыбакина тағы бір америкалық теннисші Шелби Роджерспен шеберлік байқасса, Юлия Путинцева беларуссиялық Вера Лапкоға қарсы ойнайды. Ал Михайл Кукушкиннің қарсыласы – чилилік Кристьян Гарин.