Қазақстанда 2020 жылға қарай бірінші дәрежелі автожолдардың көлемі 4 мың шақырымға дейін жететін болады
Бұл туралы алдыңғы күні Көлік және коммуникация вице-министрі Мереке Пішембаев Қазақстан Республикасы Президенті жанындағы Орталық коммуникациялар қызметіндегі баспасөз мәслихатында айтты.
Қазақстанда 2020 жылға қарай бірінші дәрежелі автожолдардың көлемі 4 мың шақырымға дейін жететін болады
Бұл туралы алдыңғы күні Көлік және коммуникация вице-министрі Мереке Пішембаев Қазақстан Республикасы Президенті жанындағы Орталық коммуникациялар қызметіндегі баспасөз мәслихатында айтты.«Біріншіден, бізде қазір жүктемесі көп жолдар баршылық. Ондайларды біз бірінші техникалық дәрежеге көшіреміз. Біздің сол санатқа енгізілген Астана–Бурабай бағытындағы бірінші автобанымыз 6 қатар белдеулерден тұрады. Қазіргі статистиканың өзі мұндай жолдардағы апат саны әдеттегі трассаларға қарағанда – 3, өлім оқиғасының 22 есе аз болатынын көрсетіп беріп отыр. Сондықтан осы алған бағытымыздан айнымай және қазіргі қаржылық жағдайымыздың бұған мүмкіндік беретінін пайдалана келіп, өзіміздің жол бағдарламамызға сәйкес, 2020 жылға қарай бірінші категориядағы жолдар ауқымын 4 мың шақырымға жеткізуді жоспарлап отырмыз», – деді ол.
Вице-министр сондай-ақ қазіргі кездегі жол-көлік оқиғаларының айтарлықтай ауқымды бөлігі жолда жүріп келе жатқан көліктердің қарама-қарсы белдеуге шығып кетулерінен орын алатынына да назар аударып өтті. Оның сөзіне қарағанда, жол бойында төрт түлік түрлерімен соқтығысып қалудан болып жататын апаттардың да үлес салмағы аз емес.
«Осыған орай, «Батыс Еуропа – Батыс Қытай» халықаралық дәлізінің аумағында мал айдап өтетін 160 өткел жасау көзделген. Бұрын жүргізушілердің түн кезінде трасса бойында жүрген малдарды соғып кету деректері көп болатын. Қазір біз бұл проблеманы шештік», – деді Пішембаев бұдан әрі.
Вице-министр бұдан кейін екінші техникалық дәрежедегі жолдар санатына республикалық маңызы бар 7 200 шақырымдық жол бөлігінің кіретінін айтып өтті.
Серік ПІРНАЗАР,
«Егемен Қазақстан».