Вьетнам астанасы Ханой қаласында Қазақстан-Вьетнам сауда экономикалық және ғылыми-техникалық ынтымақтастық жөніндегі үкіметаралық комиссиясының алтыншы мәжілісі болып өтті, деп хабарлады ҚР СІМ-інің баспасөз қызметі.
Вьетнам астанасы Ханой қаласында Қазақстан-Вьетнам сауда экономикалық және ғылыми-техникалық ынтымақтастық жөніндегі үкіметаралық комиссиясының алтыншы мәжілісі болып өтті, деп хабарлады ҚР СІМ-інің баспасөз қызметі.
Қазақстан делегациясына еліміз Сыртқы істер министрінің орынбасары Қайрат Сарыбай, Вьетнам делегациясына осы ел Өнеркәсіп және сауда министрінің орынбасары Ле Зыонг Куанг басшылық жасады.
Шара барысында тараптар Қазақстан Республикасының Президенті Нұрсұлтан Назарбаевтың 2011 жылы Ханойға, Вьетнам Президенті Чыног Тан Шанганың 2012 жылы Астанаға сапарлары барысында қол жеткізілген уағдаластықтардың орындалу жағдайы, сондай-ақ, Қазақстан Республикасы мен Вьетнам Социалистік Республикасы арасындағы 2011-2013 жылдарға арналған бірлескен іс-қимыл жоспары талқыланды.
Үкіметаралық комиссияның отырысына қатысушылар саяси және сауда-экономикалық салалардағы ынтымақтастық мәселелері бойынша пікір алмасып, кеден ісі, ауыл шаруашылығы, білім беру, денсаулық сақтау, мәдениет, туризм және спорт салаларындағы ынтымақтастықты дамытудың мүмкіндіктерін қарастырды және өзара сауда-саттық көлемінің жоғары өсу қарқынын қанағат сезімімен атап өтті. Екі ел арасындағы тауар айналымы биылғы жылдың тоғыз айында өткен жылдың сәйкес кезеңімен салыстырғанда 2,4 есеге өскен.
Келіссөздер қорытындылары бойынша тараптар Үкіметаралық комиссияның алтыншы мәжілісінің хаттамасына қол қойды. Құжатта ынтымақтастықтың бұған дейінгі келісімдік-құқықтық базаларын одан әрі дамыту туралы уағдаластықтарды қоса алғанда, басқа да басым бағыттар нақтыланған. Оның ішінде банкаралық өзара іс-қимыл жөніндегі бірлескен жұмыс тобын құру туралы да келісім бар.
Қазақстан делегациясының басшысы, сондай-ақ, Вьетнам Сыртқы істер министрінің орынбасары Нгуен Фын Намен кездесу өткізді. Кездесу кезінде БҰҰ, АӨСШК, АСЕАН және басқа да халықаралық ұйымдар шеңберіндегі екіжақты саяси үнқатысулар мен өзара іс-қимылдарды ілгерілетудің маңызы үлкен екені атап көрсетілді. Тараптар екі елдің Орталық және Оңтүстік-Шығыс Азия өңірлеріндегі маңызды әріптестер ретіндегі рөлі жоғары екенін қуаттады.