Ақша табу үшін неден де болса арланбайтын айлакерлердің әрекеті тыйылмай тұр. Қулығына құрық бойламайтын қаскүнемдер көше бойында қаңтарылып тұрған автокөліктердің нөмірін ұрлап, темір тұлпар иесінен ақша бопсалайтын болған.
Алматы қаласының аумағында жыл басынан бері көліктердің мемлекеттік нөмірлерін ұрлаудың 21 фактісі тіркеліпті. Әсіресе, әлеуметтік желіні ашып қалсаңыз, біз айтып отырған мәселеге қатысты жазбаларды көптеп кездестіресіз. Кейбір желі қолданушылары мұндай жағдайды өз басынан бірнеше мәрте өткергенін жазса, енді біреулер оқиға орнынан бейнежазба қалдырып, тәртіп сақшыларына мұңын шаққан. Маман сөзіне сүйенсек, көптеген көлік жүргізушілерін әбігерге салған келеңсіз оқиға шаһарда былайша өріс алып отырған.
– Бұл қылмыстар материалдық-пайдакүнемдік сипатқа ие. Құқық бұзушы жәбірленушінің мемлекеттік тіркеу нөмірлік белгісін алып кетіп, автокөлік иесіне алдын ала дайындалған есепшотына ақша салуды талап етеді. Ақша түскен соң, ұрланған нөмірді жасырған жерін көрсететінін жазып, хат қалдырады. Бұл құқық бұзушылық бойынша ҚР ҚК-нің 190-бабына сәйкес қылмыстық іс қозғалады. Жыл басынан бері мұндай ұрлықтың бірнеше фактісі тіркелген. Күдікті анықталды. Сонымен қатар біз азаматтарды қаскүнемдердің жетегіне ермеуге және дереу «102» пультіне хабар беруге шақырамыз, – дейді Алматы қаласының ПД Криминалдық полиция басқармасының бастығы Еркін Іңкәров.
Көлік санының көптігінен көш бастап тұрған мегаполисте мұндай оқиға жыл сайын тіркеліп отырады. Алматы қалалық Полиция департаменті баспасөз қызметінің мәліметінше, тіркелген 21 ұрлықтың 20-сы әшкереленген. Аталмыш оқиға бойынша үш адам қылмыстық жауапкершілікке тартылыпты. Нөмірді қайта рәсімдеудің машақатынан қашқан жүргізушілер алаяқтардың арбауына көніп, айтқан ақшасын амалсыз аударған жағдайлар да жетерлік. Азаматтарды абай болуға үндеген мамандар, көлік нөмірін қосымша бекіткіштермен ұстатып, түнгі уақыттарда қалтарыс орындарда қалдырмауға шақырды.
АЛМАТЫ