Премьер-Министрдің орынбасары Ералы Тоғжанов жұмыс сапарымен Атырау облысында болды, деп хабарлайды Egemen.kz.
Мемлекет басшысының тапсырмасына сәйкес өңірлердің эпидемиологиялық жағдайы және коронавирустық инфекцияның екінші толқынына дайындығымен танысу мақсатында ҚР Премьер-Министрінің орынбасары Ералы Тоғжанов жұмыс сапарымен Атырау облысында болды. Жедел кеңесте Атырау облысының әкімі өңірдің COVID-19 екінші толқынына дайындығы туралы баяндады. Кеңес қорытындысы бойынша Е.Тоғжанов өңір басшылығына эпидемиологиялық ахуалды, халықты және медициналық мекемелерді дәрі-дәрмекпен, сондай-ақ ӨЖЖ аппараттары және оттегі концентраторларымен қамтамасыз етілу мәселелерін ерекше бақылауда ұстауды тапсырды.
Сондай-ақ, өңір басшылығына карантин режимін сақтау қажеттілігі туралы халық арасында түсіндіру жұмыстарын күшейту тапсырылды. Жұмыс сапарының барысында вице-премьер 200 төсектік модульді жұқпалы аурулар ауруханасы құрылысының барысымен танысты, облысты дәрі-дәрмекпен қамтудағы тұрақтандыру қорына және аймақтың дәріхана желілеріне 42 атау бойынша дәрілік заттарды жеткізетін «Іңкәр» ЖШС қоймасының жұмысымен танысты. Сондай-ақ, Е. Тоғжанов Атырау қаласының № 4 емханасында болды. Бүгінгі күні өңірде бірінші болып келушілердің дене қызуын автоматты түрде өлшейтін роботты іске қосқан емханада 343 медицина қызметкері жұмыс істейді. Сонымен қатар, Е.Тоғжанов өңірде «Жұмыспен қамтудың 2020 - 2021 жылдарға арналған жол картасы» бағдарламасы аясында жүргізіліп жатқан алты жолақты автожолдың құрылыс жұмыстарының сапасымен және 600 орындық мектеп құрылысының барысымен танысты.