Тіл – құдірет. Бойлаған сайын тұңғиығына тартып, иірімімен үйіріп әкетуі де әбден ықтимал. Қазақ тілін жөргегінен меңгерген кейіпкеріміз осылай дейді.
Әуелі қазақ тіліндегі таңғажайып ертегілерді үлкендердің айтуынан тыңдаған. Кейін өзі оқып, сиқырлы әлемнің ішінде жүрді. Тілге деген құмарлық, білуге деген бейім осы кезде қалыптасты. Көзі ілінгенше қиял әлемінде, есте жоқ ескі кезеңде өзі сүйіп оқитын ертегі кейіпкерлерімен бірге жүретін. Бір ғажабы, қазақ тіліндегі ертегілердің бәрі жақсы аяқталады. Кейіпкерлері де мейірбан, пейілдері дархан даланың кеңдігіндей. Аңқау, адал. Тірі жанға жамандық ойламайды. Талай ертегіні еліте оқығанынан түйгені осы. Бүгінде өзге ұлт өкілдері арасында өткізілетін сан алуан байқауда жүлде алып жүрген, жергілікті ұлт тілінің білгірі, Атбасар қаласының тумасы Тамила Мартазанова ертегі әлемімен ержеткендердің бірі.
Атбасар қаласындағы №2 көпсалалы орта мектепте оқып жүрген кезінде тілді толайым меңгеруге ұстазы Алтынай Қаженова көп ықпал еткен екен.
– Ең алдымен тілімді қалыптастырып, осы деңгейге жеткізген ұстазыма айтар алғысым көп, – дейді Тамила Магаметқызы, – алдымен қалалық, сосын аудандық, облыстық, республикалық өзге ұлт өкілдері арасында өткізілетін сан алуан байқауларға қатыстым. Жүлдесіз қалған жерім жоқ. Осы байқауларға тыңғылықты дайындық керек болды. Сол кезде ұстазымның жанынан шықпайтынмын. Алтынай Қасымқызы байқауға өзі ертіп апаратын. Мен қанша қобалжып, уайымдасам, ол кісі менімен бірге, бәлкім менен де көп уайымдайтын. Бүгінде қазақ тілін қапысыз меңгеріп, табысқа жететұғын болсам, ол ең алдымен ұстазымның арқасы. Тілді ғана емес, елді, Отанды сүюді үйретті. Салт-дәстүрдің, әдет-ғұрыптың мәнін ұқтырды. Ұлт тілін, оның қилы-қилы тарихын, соқтықпалы-соқпақты жолынан өткен тағдырын тереңірек білген сайын менің жан-дүнием қазақы әлеммен табыса түседі. Өңіме қарап жұрт нәсілім басқа екендігін танығанымен, тілдесе келе қазақтың бойжеткендерінен айырмашылығымның жоқ екендігін ұғар еді. Өйткені, мен де осы елдің қызымын.
Біршама шешен сөйлейтін, тілді еркін меңгерген Тамила Магаметқызының айтуына қарағанда, тіл білу өмір жолындағы жүкті де жеңілдеткен. Облыс орталығындағы Ш.Уәлиханов атындағы Көкшетау мемлекеттік университетінің заң факультетін ойдағыдай аяқтағаннан кейін еңбек жолын бастағанда көп-көрім көмек болыпты. Әсіресе іс қағаздарын жүргізгенде. Талап бойынша қос тілді қатар білу керек. Орыс тілінде де еркін сөйлейтін жас қыз тіл мәселесіне келгенде тіпті қамшы салдырмайды.
–Тілді еркін меңгеру үшін қоршаған ортаның әсері көп болатындығы белгілі, – дейді кейіпкеріміз, – менің әкем Магамет Баматгирұлы, анам Мадаш Магаметқызы менің қазақ тілін үйренгеніме ешбір қарсылық білдірген жоқ. Қайта осы қадамың өте дұрыс деп қанаттандырып отырды. Ата-анамның айтуына қарағанда, біздің ата-бабамызды қиын-қыстау кезеңде қазақ халқы құшақ жая қарсы алған. Бір уыс бидаймен бөліскен, бір үзім нанды бөліп жеген. Сол қамқорлықтарының арқасында ел қатарына қосылыппыз. Енді сол жақсылықтың өтеуін қалай қайтарамын деп көп ойландым. Менің қолымнан не келеді? Егер тілін меңгерсем, дәстүрін қадірлесем, осы даланың перзенті болсам, елге адал қызмет етсем аталарыма сіңірген еңбектің бәрін болмаса да, бір шөкімін ақтар едім ғой.
Қазақ даласында туып, халқының қасиетін қадірлеген қаршадай қыздың пейіліне, алдына қойған мақсат-мұратына бек разы болдық. Барлығы адам санасында ғой. Санасына сәулелі, ізгі ой ұялатқан, бүгінде облыс орталығындағы құқықтық кеңес беру орталығында заңгер болып жұмыс істейтін Тамиланың тұжырымы дұрыс-ау, шіркін!
Көкшетау