Бұл күндері Перудің бас шаһары – Лима қаласында ауыр атлетикадан жастар арасындағы онлайн әлем кубогы өтіп жатыр.
Ұлттық олимпиада комитетінің хабарлауынша, жарыстың үшінші күнінде 73 кг салмақ дәрежесіндегі спортшылар сынға түсті. Бұл бәсекеде Қазақстан атынан Мейрамбек Әбдіхалық қатысып, турнир нәтижесінде төртінші орынға табан тіреді. Ол қоссайыс қорытындысы бойынша 275 (123+152) келіні бағындырған.
Айта кетелік, әзірге Қазақстан қоржынында жалғыз алтын бар. Бірінші жарыс күнінде 55 килода бақ сынаған Абылай Әуелханов қоссайыс нәтижесінде 237 (102+135) килоны еңсеріп, әлемдік жарыста топ жарды.