Қалалық жерлерде жол-көлік оқиғасының салдарынан кептелек туындайды. Патрульдік полиция келіп, хаттама толтырғанша, оқиға орны қозғалысқа айтарлықтай кедергі келтіреді. Осы мәселеге назар аударған Өскемендегі жоғары оқу орындарының ғылыми қызметкерлері мән-жайды анықтаудың оңтайлы жолын ұсынып отыр.
Д.Серікбаев атындағы Шығыс Қазақстан техникалық университетіндегі ғылыми қызметкерлердің айтуынша, жол-көлік оқиғасы соқтығысқандардың ғана емес, басқа да көлік жүргізушілерінің, жолаушылардың алтын уақыттарын алып қояды. Мамандардың мөлшерлеуінше, полиция қызметкерлері өлшеп, хаттама толтырғанша кем дегенде бір, бір жарым сағат уақыт өтеді. Ал технологияның дамыған заманында оқиға себебін анықтаудың жедел жолдары бар.
– Жол-көлік оқиғасында кінәлі жақты анықтау үшін әр сантиметр маңызды. Сондықтан барлық өлшемдер дұрыс болуы керек. Біз коптер арқылы әуеден фотоға түсіріп, оқиға көрінісін модельдеуді ұсынып отырмыз. Содан кейін деректер негізінде автотехникалық сараптама жүргізуге болады. Ең маңыздысы, бұл әдіс полицейлер мен жолаушылардың уақытын үнемдейді, – деді «Veritas» озық даму орталығының бас маманы Андрей Охотенко.
Әуеден жасалған фототүсірілім арқылы қажетті параметрлер автоматты түрде есептеледі екен. Нақтырақ айтсақ, автокөліктің зақымдануы анықталады, көліктің тоқтаған жолы өлшенеді. Қажет болған жағдайда автокөлік пен ұшып кеткен сынықтар арасындағы қашықтық есептеледі.
«Veritas» орталығы маманының пікірінше, әуе фототүсірілім рәсімінен кейін соғылып қалған көліктерді жолдан алып тастауға болады.
Облыстық прокуратура мамандары қатысқан жиында ұсынылған жобаға полиция департаментінің қызметкерлері қызығушылық танытты. Қосымша жол-көлік оқиғасы болған жерлерді белгілеу үшін 3D форматта компьютерлік модельдеуді қолдану керектігі айтылды. Жоба қабылданып, жүзеге асып жатса, Полиция департаменті ұшқышсыз ұшу аппараттарымен, қосымша бағдарламалармен қамтылуы керек. Сондай-ақ әрбір жол патрульдік полициясы коптер ұшыруды меңгеруі тиіс.
ӨСКЕМЕН