Мектеп оқушыларының ой-өрісін кеңейтуге, әсіресе ауыл балалары үшін қосымша білім берудің әсері мол. Осы орайда Қызылқоға ауданындағы Сағыз орта мектебінің өзгелер үйренетін үздік үлгісі бар. Мұны қосымша білім алатын оқушылардың робот құрастырып, дрон ұшыруымен байланыстырып отырмыз.
Директордың міндетін атқарушы Мейрамгүл Аяғанованың айтуынша, бұл мектеп екі жыл бұрын пайдалануға берілді. Қазір мұнда 424 оқушы білім алады. Мектепте қосымша кадет сыныбы, өндірістік, тігін шеберханалары, гимнастика орталығы мен ТИР алаңы бар. Оқушылар шығармашылығын дамыту мақсатында16 үйірме мен 4 клуб ашылыпты.
Бұл білім ордасының аудандағы өзге мектептерден бір өзгешелігі бар. Мұнда жаңашыл ұстаздар да, ойы жүйрік, қолы шебер оқушылар да көп. Мәселен, химия пәнінің мұғалімі Ақынта Бисембиева былтыр республикалық ғылыми жобалар байқауына қатысып, жеңімпаз атанды. Сөйтіп, жүлдеге STEM зертхананы ұтып алды. Шәкірттерінің жаңа технологияларды жетік меңгеріп, білімді болғанын қалайтын ұстаз осы заманғы зертхананы өзі еңбек ететін мектепке сыйлады.
– Биылғы қаңтардан бері 30 оқушы жаңа зертханада қосымша білім ала бастады. Мұнда жоғары сыныптың оқушылары арнайы бағдарлама жүктелген 3D принтердің көмегімен телефон тіреуішін, құмыралар мен ерекше форматтағы Абай кітабын, брелоктар, медальдар жасап шығарды. Оқушылар құрастырған дрон әдеттегідей әуеде ұшады. Тіпті су бетінде жүзіп, видео түсіреді. Дронның әуеде ұшу жылдамдығы секундына 1,5 метр. Ал су бетінде секундына 2,5 метрге дейін жүзеді. Әзірге эксперимент түрінде құрастырылған дронның қуаты 6 минутқа жетеді. Кейін қайта қуаттауға болады. Сонымен бірге оқушылар ағаш станогымен, 3D ноутбукпен жұмыс істеуді үйренуде, – дейді STEM зертхананың лаборанты Ләйла Шыңдыбаева.
Оның айтуынша, оқушылар STEM зертханада үш түрлі функция атқаратын роботтар құрастырыпты. Мәселен, Мбот роботы өздігінен бұрылып, түрлі кедергіден өте алады. Екінші робот әуенмен қозғалады. Үшінші робот арнайы бағдарлама арқылы сызылған сызбалар бойымен жүреді.
– STEM зертхана математика, инженерия бағытындағы осы заманғы технологиялық ізденістерге бағытталған. Жоғары сыныптың оқушылары роботтарды құрастырады. Төменгі сынып оқушылары дрон мен робот құрастырудың тәсілдерін үйреніп жатыр, – дейді Сағыз орта мектебі директорының міндетін атқарушы Мейрамгүл Аяғанова.
Ал Бақыт Қойшығали жетекшілік ететін үйірмеде 20-дан астам оқушы классика, эстрада және ұлттық би бағытында дәріс алады. Қазірдің өзінде балғын бишілердің онлайн-форматта өтіп жатқан «Жарық жұлдыз» конкурсында шоқтығы биік тұр.
Атырау облысы,
Қызылқоға ауданы