Тәуелсіздік мерекесіне орай Қарағанды облысында «Менің туым. Менің Отаным!» бұқаралық челленджі өтті. Іс-шара барысында тұрғын үйлердің терезелері мен балкондарына Қазақстан туы ілінді. Аталған акция санитарлық-эпидемиялық талаптарды қатаң сақтай отырып ұйымдастырылды.
16 желтоқсан күні сағат 10.00-де Қарағанды қаласында басталған «Менің туым. Менің Отаным!» челленджі облыстың Балқаш, Жезқазған, Сәтбаев, Саран және Шахтинск қалаларында жалғасын тапты.
Челлендж барысында кеншілер астанасындағы «Қарағанды» қонақ үйінің балкондарына 20-ға жуық ту ілініп, жастар аталған челленджді Балқаш қаласына жолдады.
Сонымен қатар 17-18 желтоқсан күндері Абай ауданында 20-ға тарта автокөліктермен авто-мотошеру ұйымдастырылды. Облыстың Ақтоғай, Шет, Жаңаарқа аудандарында жастар атқа қонып, ту көтеріп, басты көшелерде челлендждің көрігін қыздырды. Аталған челленджге тұрғындар зор қызығушылық танытып, әлеуметтік желілерде де жаппай қолдауға ие болғанын айта кеткен ләзім.
Сондай-ақ 17-18 желтоқсан күндері облыстың қалған қалалары мен аудандары аталған челленджді жалғастырды.
Акция аясында «Табысқа бастайтын жол» онлайн-челленджі, «Менің туған өлкем. Өркендеу мен табыс серпіні» онлайн-марафоны ұйымдастырылды. Облысқа танымал, тәуелсіздікке елеулі үлес қосқан белгілі қазақстандықтардың, еңбек ардагерлерінің, жастар өкілдерінің бейнеқұттықтаулары әлеуметтік желілерде, LED экрандар арқылы көрсетілді.
Қарағанды облысы