Ұлы дала дауысы

Ән десе ішкен асын жерге қоя­тын жұрт­шы­лық кеше кешкісін елор­дадағы «Қа­зақ­­­стан» Орта­лық концерт залын бетке алды.

Ән десе ішкен асын жерге қоя­тын жұрт­шы­лық кеше кешкісін елор­дадағы «Қа­зақ­­­стан» Орта­лық концерт залын бетке алды.

Мұн­да «Қазақстан» республикалық телерадио корпорациясы АҚ, Қазақ радиосының төл жобасы ІІ халықаралық «Дала дауы­сы» радиофестивалі жеңім­паз­дарын салтанатты марапаттау рәсімі өтті. Аталған ірі жобада радио тыңдаушы және кәсіби мамандар анықтаған үздік әндердің орындаушылары өнер көрсетті.

«Дала дауысы» радиофестиваліне жал­пы саны жүз орындаушы қатысып бақ­тарын сынаса, төрт номинация бойынша оның жиырмасы жеңімпаздар қатарынан орын алып отыр. Атап айтқанда, «Үздік дәстүрлі орындаушы» аталымында Ерлан Рысқали, Ырысты Сүлейменова, Ақмарал Ноғайбаева, Гүлмира Сарина және Ақмарал Ерімбетова үздіктер қатарынан көрінді. Ал «Үздік эстрада әншісі» болып «МузАРТ» то­бы, Нұрлан Албан, Зағипа Иманғазиева, Адам, Алмас Кішкенбаев және V-ALEM, «Алаш­­ұлы» тобы мен Ғани Мәтебаев танылды. «Үздік академиялық орындаушы» но­ми­­нациясында Станислав Ни мен Дина Хам­зинаның бағы жанса, «Жаңа есім­дер» құ­рамын Анар Құмарова, Марат Меде­тов (Қазақстан), «Дос» дуэті (ҚХР), Фериал Ба­шел (Түркия), Айдай Сәбитова (Қыр­ғыз­стан), Салтанат Бигулина (Ресей) толық­тыр­­ды.

Жеңімпаздарды мемлекет және қоғам қайраткері Мырзатай Жолдасбеков, Қазақстан Республикасы Президенті Кеңсесінің Бастығы Махмұт Қасымбеков, «Қа­зақстан» республикалық телерадио кор­по­рациясының төрайымы Нұржан Мұха­мед­жанова, «Егемен Қазақстан» РГ» АҚ пре­зиденті Сауытбек Абдрахманов, Мәде­ниет және ақпарат министрлігі Ақпарат және мұрағат комитеті төрағасының орынбасары Еркеғали Кәрбозов және Юнус Эмре түрік мәдени орталығының директоры Ибрагим Иылдырым сынды азаматтар марапаттап, оларға ақ жол тіледі. Мырзатай Жолдасбеков жобаны болашақта «Ұлы дала дауысы» деп атау­ды ұсынып, қайраткер ағаның ұсынысы қолдау тапты.

Әбдірахман ҚЫДЫРБЕК,

«Егемен Қазақстан».