Үндістанның Уттаракханд штатында мұз көшкіні болып, 150-ден астам адам жоғалып кетті, деп хабарлайды Egemen.kz
Алдын ала мәліметтер бойынша жоғалып кеткендердің көпшілігі Ришиганг су электр стансасының жұмысшылары.
Гималай тауларының Алакнанда мен Дхаулиганга өзендеріне үлкен мұз массалары түсіп, ол Үндістанның солтүстігіндегі Уттаракханд штатында су тасқынына себеп болды. Төменде орналасқан Сринагар, Ришикеш және Харидвар қалаларындағы су электр станциялары шұғыл түрде суды ағызып жатыр.
Құтқарушылар жеті адамның денесін тапқан. Қазіргі уақытта апат аймағында жұмыс жалғасып жатыр.
Сондай-ақ өзеннің жанында орналасқан елді мекендерде автокөлік және темір жол көпірлерін салу жобаларында жұмыс істейтін қызметкерлердің өміріне де қауіп төнген.
Тасқынға байланысты билік су электр стансасының астында орналасқан елді мекендерді эвакуациялай бастады.
Айтолқын МЫРЗАКАРИМ