Кеше Нидерландтың Роттердам қаласында осы жылы Токиода алауы тұтануға тиіс Олимпия ойындары бағдарламасындағы ватерполшылар турнирінің жеребесі тартылды, деп хабарлайды Egemen.kz.
Соған сәйкес Қазақстанның ерлер құрамасы В тобында өнер көрсететін болды. Қарсыластарымыз – Аустралия, Хорватия, Сербия, Испания және Черногорияның су добы шеберлері. Өздеріңіз байқасаңыздар, бұл командалар арасында осалы жоқ. Барлығы да аса ірі халықаралық жарыстарда жеңіс тұғырына көтеріліп жүрген мықты әрі тәжірибелі құрамалар. А тобында Оңтүстік Африка Республикасы, АҚШ, Мажарстан, Грекия, Жапония және Италия ватерполшылары өзара күш сынасады.
Ал әйелдер сайысына қатысатын командалар мынадай топқа бөлінді: А тобы – Аустралия, Оңтүстік Африка Республикасы, Нидерланд, Испания және Канада. В тобы – Ресей, Қытай, Мажарстан, АҚШ және Жапония.