Биыл Маңғыстауда Өзен және Жетібай кен орындарында мұнай бұрқағының атқылағанына 60 жыл толмақ. Мереке қарсаңында мұнайы мол дала тағы бір жағымды жаңалықты халық игілігіне ұсынды. Ол – Маңғыстау облысындағы Бейнеу және Маңғыстау аудандарының аумағында орналасқан Тәңке учаскесінен ТЗ-1 бірінші барлау ұңғымасынан мұнай бұрқағының атқылауы. Алынған сынамалар бойынша мұнай сапасы өте жоғары, жеңіл, күкірті жоқ.
Қуанышты хабарды жеткізген «Меридиан Петролеум» компаниясының президенті Б.Қуандықовтың айтуынша, Тәңкедегі кенорын – еліміз тәуелсіздігін алғалы 30 жылда Маңғыстау облысында ашылған алғашқы ең ірі кен орны болмақ.
– 2018 жылы басталған геологиялық барлау жұмысы нәтижесін берді. Алынған мұнайдың қысымы, дебиті, газдық факторы және басқа да параметрлері бойынша ірі кен орны болады деп жоспарлап отырмыз. Қазір кен орнындағы мұнай қорын анықтау жұмыс- тары жүріп жатыр. Жаңа кен орнының айналасында «Қарақұдық», «Арыстан» және «Комсомольское» кен орындары орналасқан, – деді «Меридиан Петролеум» компаниясының президенті Б.Қуандықов.
Жаңа кен орнына аты аңызға айналған геолог-барлаушы, Маңғыстаудағы барлық кен орнын ашуға атсалысқан Халел Өзбекқалиевтің есімі берілді.
Жұртшылық жаңа мұнай кен орнының ашылуы өңірдің әлеуметтік-экономикалық дамуына кең серпін беріп, жаңа жұмыс орындарының құрылуына жол ашады деген сенімде.