Жаман індеттің құрықтала бастауымен қатар мектеп оқушылары жаңаша оқу форматына шұғыл көшіріліп жатыр. Облыстық білім басқармасының басшысы Гүлмира Кәрімова: «Өңірдің «жасыл аймаққа» өтуіне байланысты білім беру ісін ұйымдастыруда қалыпты режімге біртіндеп көшу басталды», деді.
Соның ішінде 300-ге дейін оқушысы бар қала мен ауыл мектептері қалыпты жағдайда оқуды жалғастырады. 9, 11-сынып оқушылары да бұрынғы қалыпта қалады, атап айтқанда, олардың оқитын пәндерінің 70 пайызы штаттық, ал 30 пайызы қашықтан оқу режімінде болады. Сыныптарда 15 баладан артық болмауы да қадағаланады.
Ең басты өзгеріс – 1-5-сыныптарда. Ертеңнен бастап ондағы оқушылар құрамы толық форматта оқытылады. Мұның мәнісі сол, оқушылар тегіс келеді. Тек балаларының дертке ұшырауы себепті қашықтан оқытуды қалаған ата-аналардың тілегімен ғана үйден оқытуға болады. Мектептер екі ауысымда оқытуға да бірден көшпекші. Бірінші ауысымда 1, 4, 9, 11 және екінші ауысымда 3, 4, 5-сыныптар оқытылмақ. Ал 6, 7, 8, 10-сыныптар қашықтан оқуды жалғастырады.
Қаладағы Әбу Досмұхамедов атындағы дарынды балаларға арналған мектеп-гимназия сияқты арнаулы мектептерде сыныптардың толық болуына рұқсат етілген. Осы тәртіп барлық мектеп пен сынып жетекшілеріне жеткізілді.
Г.Кәрімова бәрі де құлақтандырылып, жаңа тәртіпке көшуді бастайды дегенімен, көптеген ата-аналар мен журналистер жаңа тәртіпке көшудің шұғыл болуына наразалық білдірді. Бұл жаңалықпен ата-аналарды да құлақтандыру керек екендігі көп айтылуда. Шынында, көптеген ата-аналар балаларының қашықтан оқытылатынына үйреніп, өздерінің жұмыс жоспарларын соған үйлестіріп қойған. Енді аяқ астынан білім басқармасының мұндай шешім қабылдағаны барлық ата-анаға жайсыз тиіп жатыр. Бұдан кім не ұтатыны белгісіз. Өзгерістердің бәрін 20 күндей ғана қалған келесі тоқсаннан бастағаны дұрыс еді деген сөздерді де естідік.
Осы асығыстықтың өзі дұрыс шешімдерді қабылдауға деген ықыластың жоқтығын көрсетіп тұр. Қай күнде де асығыстық жақсылыққа апармайтынын жас басшылар біле бермейтін сияқты.
Солтүстік Қазақстан облысы