Бірнеше ай бұрын қазақстандық музыкант Иманбек Зейкеновтің (Imanbek) Saint JHN орындайтын «Roses» әніне жасаған ремиксі америкалық дыбыс жазу өнері және ғылым академиясы ұйымдастыратын «Грэмми» сыйлығына ұсынылған еді. «Roses (Imanbek Remix)» трегі «Best Remixed Recording» номинациясы бойынша «Грэмми» премиясын жеңіп алды. Айта кетейік, Иманбек – «Грэмми» алған алғашқы отандасымыз.
Осыған орай Мемлекет басшысы Қасым-Жомарт Тоқаев қазақстандық Иманбек Зейкеновке аса беделді Grammy музыкалық сыйлығының табыс етілуі жөніндегі жаңалықты зор қуанышпен қабылдады. Бұл туралы Президенттің баспасөз хатшысы Берік Уәли өзінің Facebook парақшасында жазды. «Өзінің таланты мен мақсат қоя білуінің арқасында диджей Imanbek әлемдік шоу-бизнестің басты сыйлықтарының бірін иеленді. Оның шығармашылығы қазақстандық жастардың да ең биік шыңдарды бағындыра алатынын дәлелдеді. Президенттің атынан Иманбекті осы жарқын жеңісімен құттықтаймын және жаңа шығармашылық табыстар тілеймін!», делінген жазбада.
Еске сала кетейік, «Egemen Qazaqstan» газеті алғашқылардың бірі болып жас өнерпаздың дарынына ерекше қызығушылық білдіріп, үн қосқаны, 2020 жылдың 18 қыркүйектегі санында «Иманбектің иірімдері» атты мақала жарық көргені оқырмандардың есінде болар.
Кешегі сүйінші жаңалық аталған сыйлықтың Twitter парақшасында хабарланды. 21 жастағы танымал рэпер 63-рет ұйымдастырылған Grammy жүлдесі үшін бақ сынасқан төрт үміткердің ішінен қара үзіп шыққан. Сыйлықты алған сәтінде ол ең алдымен ата-анасына, командасына, менеджеріне және Grammy қазыларына алғысын жеткізеді. Өз жазбасында: «Әр музыканттың шығармашылық жолындағы ең керемет сәт – Grammy сыйлығын иелену. Біз осы жетістікке қол жеткіздік», деді музыкант.
Жуырда көпшілікке диджей ретінде танылған жерлесіміз Imanbek Rita Ora және David Guetta сияқты әлемге әйгілі музыканттармен бірге ән жазған болатын. Өзінің айтуынша, ол ән әрлеуді жергілікті диджейлер мен продюсерлерден және Youtube желісіндегі видеосабақтардан үйренген.
2019 жылы Иманбек рэпер Saint Jhn-ның Roses деген әнін байқап, оны билеуге ықшамдап ремикс жасаған. Ремикс өте жылдам қарқынмен танымал бола бастады. Дүние жүзіндегі біршама чарттарда болды. Ремикс YouTube-те 145 миллионнан аса қаралым жинаған.
The New York Times басылымына сұхбат берген Иманбек ата-анасымен бірге Павлодар облысына қарасты Ақсу қаласында тұрады.
Кейінгі жылдары ән өнері мен кино саласындағы ел таланттары әлемдік аренада жиі топ жарып жүр. Асқақ үнімен жер-жаһанды тамсандырған әлемдегі ең танымал қазақстандық Димаштың өзі бір төбе. Канн кинофестивалінде ең үздік әйел рөлі үшін марапатталған Самал Еслямованың жұлдызды жеңісін де ұмыта қойған жоқпыз. Қазақ өнерінің деңгейін көтеріп, мәртебесін асыратын өнерпаздар көп болсын дейміз.