Фронт-кеңселер қызметі тиімді ме?

Облыс орталығындағы «Астана» көшесі, №59 мекенжайында өңір тұрғын­дарына нағыз қажетті облыс­тық денсаулық сақтау, жұмыс­пен қамтуды үйлестіру және әлеуметтік бағдарламалар басқармалары мен еңбек және әлеуметтік қорғау және көші-қон департаменті орналасқан.

Денсаулық сақтау басқармасы 4-қабатта, қалған мекемелер де осы деңгейлес қабаттарда орналас­қан­дықтан, халыққа бұл мекемелерге барып, жоғарыға көтеріліп, өті­ніш-арыздарын жеткізу қанша­лық­ты қиын екені айтпаса да түсінікті.

Жақында осы ғимараттың бірін­ші қабатында «Әлеуметтік фронт-кеңсе» ашылды. Бұл кеңсе өңір тұр­ғындарына жоғары қабатқа көте­рілмей-ақ, мемлекеттік қызмет көр­сетуге мүмкіндік береді. Дәл осы жерде басқарма мамандары тұрғын­дардың арыз-шағымдары мен өті­ніштерін тыңдап, қажетті кеңес­тер береді.

Кеңсе Сыбайлас жемқорлыққа қарсы іс-қимыл агенттігі өңірлік департаментінің бастамасымен ашылды. Жаңадан тағайындалған департамент басшысы Ернар Баян­ғазин тұрғындарға қолжетімді осын­дай кеңселерді ашу Мемлекет бас­шысының «Халық үніне құлақ аса­тын мемлекет» тұжырымдамасы аясында жүргізіліп отырғанын атап өтті.

«Ғимаратта орналасқан үш орган мемлекеттік қызметтің көп бөлігін ұсынады. Кеңсе халықтың сол қызметтерді алуын жеңілдету үшін ашылды. Халық бүкіл каби­нет­терді араламай-ақ қызметті бір жер­ден ала алады. Ең бастысы, жем­қорлықты, шенеунік пен қызмет алушы арасындағы тікелей байланыс­ты азайтады. Мұның бар­лығы халықтың жағдайын жақ­сарту үшін жасалуда», деген Ернар Баянғазин жақында бұл жерде департаменттің тегін құқық­тық кө­мек беретін «Адал көмек» жоба­лық кеңсесі ашылатынын хабарлады.

Ал облыстық денсаулық сақтау басқармасы басшысының орынбасары Гүлнәр Буратаева фронт-кеңсе тұрғындар тарапынан жиі қойылатын сұрақтарға жауап беруге, түскен өтініштерге сараптама жасауға көмектесетінін айтып, мүмкіндігі шектеулі жандар үшін де өте ыңғайлы екенін жеткізді.

Өңір халқы басқармаға емделу, дәрімен қамтамасыз ету, мүге­дектікке қатысты мәселелер бойын­ша өте жиі келеді. Мысалы, жыл басынан бері 19 өтініш түсіп, оның 16-сына жауап берілген.

Сондай-ақ, кеңседе үш басқар­маның мамандары, бөлім басшылары, басқарма басшыларының орынбасарлары және басқарма басшылары арнайы кесте бойынша тұрғындарға жеке қабылдау күндерін өткізеді. Алдағы уақытта аймақтағы ауыл шаруашылығы басқармасының ғимаратында да фронт-кеңсе ашу ұсынылып отыр. Өйткені  өткен жыл ішінде облыстың ауыл шаруашылығы саласында 33 қылмыстық іс қозғалған. Сол себепті Ернар Баянғазин өңірдегі ауыл шаруашылығы саласын сыбайлас жемқорлық тәуекелдерінен арылту, мемлекеттік қызметшілер мен тұтынушылар арасында кез кел­ген бұзушылықтарға төзбеу­шілікті қалыптастыру қажет деп санайды. Ал ауыл шаруашы­лығы басқармасында мемлекеттік қыз­меттің 18 түрі көрсетіледі. Оның бірі – субсидиялау. Басқарма арқылы өтетін бұл қаржылай мемлекеттік қолдау үлкен жауапкершілікті талап етеді. Яғни мемлекет бөлген әрбір теңге фермерге жетуге тиіс.

Тұрғындардың дені сервистік әкімдіктер арқылы жер, жайылым мәселесі, Нәтижелі жұмыспен қамтуды және жаппай кәсіпкерлікті дамытудың «Еңбек» мемлекеттік бағдарламасы бойынша ақыл-кеңес алғылары келеді. Ал басқармаға қарасты Май, Успенка, Аққулы аудандары ауыл шаруашылығы бөлім­дері мамандарының сервистік әкімдіктерде болмайтындығы бай­қалған. Бұл іс жүзінде сервистік әкімдіктердің кейбіреулерінің қыз­меті көзбояушылық екенін аңғар­тады.

Мемлекеттік қызметшілердің тұрғындарға мемлекеттік бағдар­лама­лардың іске асырылуын дұ­рыс түсіндіре алмауы да үлкен мәсе­леге айналған. Себебі аудан орталықтары мен ауылдарда білімді, білікті мамандар тапшы. Тағы бір мәселе мемлекеттік тілге келіп тіреледі. Өйткені сервистік әкімдіктер мен фронт-кеңселерде есіктен кіргеннен бастап қабылдау тілі – орысша. Сондықтан, ең алдымен, басшылар қазақ тіліне жанашыр болулары керек.

Мысалы, Айдар Сейітқазинов басқаратын облыстық денсау­лық сақтау басқармасы қызметкер­лерінің арасында қазақ тілінде сөйлей алатын басшылар бар ма? Басқарма мамандары алдарына ауыл­дан келген қарияларға қазақ тілінде қызмет көрсете ала ма? Қала тұрмақ, ауыл­дарда қазақ тілінде мән-жайды түсіндіріп бере алатын мамандар аз.

Қазір елімізде ашылып жат­қан сервистік әкімдіктер, фронт-кеңселер жүйесі сыбайлас жем­қорлықтан арылудың және өңір тұ­р­ғындарына тез және сапалы қызмет көрсетудің тиімді бір тәсіліне айналуда дейміз. Ал олардың қызметі талапқа сай ма? Әрине, талапқа сай, бәрі жарқырап тұр, барлық техникалық құрал-жабдық, үстел, орын­дық, балалар алаңы бәрі де бар. Бірақ мәселе басқада. Енді ше­неуніктер де жоғарыдан төменге түсіп, кеңселерде қарапайым жүріп-тұрып, адамдармен тіл табысып сөйлесуге үйренгені жөн.

Павлодар облысы