Еліміздегі эпидемиологиялық жағдайды бағалау матрицасына сәйкес, Павлодар облысы 17-мамырдан бастап «қызыл аймақтан» шықты. Облыс аумағында індет таралуының өсуіне байланысты 26-сәуірден бас санитарлық дәрігердің қаулысымен «қызыл аймақтың» шектеу шаралары күшіне енген болатын-ды.
Денсаулық сақтау басқармасының басшысы Айдар Сейітқазиновтың айтуынша, қазір өңірде екпе алушылар қатары көбеюде. Облыста коронавирусқа қарсы екпенің алғашқы компонентін 66 147 адам алған. Екінші компонент 24 973 адамға салынған. Отандық вакцинаны 968 адам алды.
Қауіпті індеттен қорғанудың бірден-бір жолы – екпе алу екенін өңір тұрғындары да түсіне бастады. Өйткені, індеттің қауіптілігін өңірдің «Қызыл аймаққа» қайталанып түсе беруінен-ақ көріп, біліп отыр. Облыс орталығындағы Торайғыров университетінің оқытушылары мен студенттері, қызметкерлері оқу орнындағы дәрігерлік амбулаториядан екпе алуды бастап кетті. Медициналық бөлімшенің бас дәрігері Нұрлан Оразалиннің айтуынша, екпе егу шарасы күні бойы өтеді. Қазір вакцинаның алғашқы компонентін 150-ге жуық адам алса, екінші дозаны 20-дан астам адам қабылдаған.
– Әрине, студенттер де бар. Медициналық бөлімше өз еркімен екпе алғысы келетін кез келген адамды қабылдайды. Медбикелер вакцина салдыруға келген әр адамның денсаулығын тексереді. Індетке қарсы егілетін екпе жайында түсіндіріп, жазбаша түрде рұқсат алады. Екпе қабылдағандардың ішінде жағдайы нашарлаған адамдар болған емес, – дейді дәрігерлер.
Дәрігерлік амбулаторияда күніне 10-15 адамға екпе жасалады. Медициналық бөлімшенің дәрігерлері де екпе алуда.
Аудандарда да індетке қарсы екпе егу шарасы жүргізілуде. Әр ауданда екпе салу барысы дұрыс ұйымдастырылған жағдайда мамыр айының соңына қарай адамдарды 5-тен 15 мыңға дейін вакциналауға болар еді. Сондықтан, облыс әкімдігі тұрғындар арасында дүрбелең тумас үшін, олар екпені қайдан алатыны туралы ақпараттан хабардар болуы тиістігін, қалалар мен аудандар әкімдеріне барлық егу пунктін аралап, жұмысын үздіксіз бақылайтын тұрақты топтар құруды тапсырды. Мысалы, Баянауыл ауданында 2 464 адам вакцина алған. Аудандық аурухананың бас дәрігері Серікжан Арыновтың айтуынша, шалғайда, тау баурайындағы ауыл тұрғындарына екпе салуға арнайы бригада барды. Медициналық бригада әрбір ауылдан шақырту түскен бойда жолға шығады. Құрамында 2 дәрігер, 2 медбикесі бар бригада әр ауылдан 20-30 адамға дейін екпе салуда.
– Осы аптада Қ.Сәтбаев атындағы және Ұзынбұлақ ауылдарындағы тұрғындарға екпе егілді. Сонымен бірге, Баянауылдағы «Майқайың алтын» АҚ-тың 775 жұмысшы-қызметкері де екпе қабылдады, – дейді С.Арынов.
Ауылдағы және ауылдар маңайындағы кәсіпорындар үшін еңбек адамының денсаулығы маңызды. Індет кезіндегі басты шарт – қауіпсіздік. Компания қызметкерлер мен мердігерлердің қауіпсіздігіне, денсаулығын сақтауға басымдық беруде. Еңбек адамдарын қорғау және жұмыстағы кідірістер қаупін азайту үшін індетке қарсы тестілеу мен оқшаулауды қоса алғанда, кешенді шаралар әлі де қабылдануда. Яғни, «сары аймаққа» өту «қызыл аймақтағы» шектеу шараларында екпе алу арқылы ұжымдық иммунитет қалыптаса бастағанын білдіреді. Облыс әкімдігі қалалар мен аудандарда екпе егілетін жерлердің тізімін тұрғындарға хабарлап, ақпараттық жұмыстарды жалғастыруда. Қазір 135 егу орны дайындалған. Арнайы орындарға барып екпе жасайтын 37 топ та бар. Сондықтан, қандай аймақ болсын, індет таралуы жағдайында сақтану, жақынына жанашыр болу әркімнің міндеті.
Павлодар облысы