Кеншілер астанасындағы Қазтұтынуодағының Қарағанды экономикалық университетінде дене тәрбиесі мен спортқа ерекше маңыз берілген. Мұндағы спорт кешенінде жыл сайын түрлі республикалық және облыстық деңгейдегі жарыстар мен турнирлер өтіп тұрады.
Сонымен қатар аталған оқу орнында елімізге белгілі көптеген спортшы білім алған. Мысалы, олардың қатарына боксшылар – Олимпиаданың қола жүлдегері Серік Елеуов, Олимпиаданың күміс жүлдегері Василий Левит, әлем чемпионатының күміс жүлдегері Қамшыбек Қоңқабаев, әлем чемпионатының екі дүркін қола жүлдегері Абылайхан Жүсіповті, сондай-ақ балуан, Олимпиаданың қола жүлдегері Эльмира Сыздықованы, конькимен жүгіруші, Азия ойындарының чемпионы, үш бірдей Қысқы Олимпия ойындарының қатысушысы Екатерина Айдованы және басқаларды қосуға болады.
Таяуда осы университетте кәсіби спорттық керек-жарақпен жабдықталған жаттығу залы салтанатты түрде ашылды. Оқу орнының басшылары бұл залдың «Дене тәрбиесі және спорт менеджменті» мамандығы үшін зертхана ретінде пайдаланылатынын да айтады. Мұнда емдік дене шынықтыру, фитнес-технологиялар, таңдалған спорт түрінде оқыту әдістемесі сияқты пәндер оқытылатын болады. Сонымен қатар бұл залда футзал, волейбол, баскетбол, жеңіл атлетика бойынша университет құрама командаларының жаттығулары өтеді.
Айта кету керек, аталған залда кәсіби спорт жабдықтары өнімдерімен аты әлемге танымал болған Shandong Tianzhan Fitness Equipment Co компаниясының 19 түрлі жаттығу құралы орнатылған.
ҚАРАҒАНДЫ