Алматыда Құрманғазы атындағы Қазақ ұлттық халық аспаптар оркестрінің ұйытқы болуымен дәулескер күйші, Қазақстанның халық әртісі, Мемлекеттік сыйлықтың лауреаты Қаршыға Ахмедияровтың туғанына 75 жыл толуына орай «Күй қаршыға – Күй ғұмыр» атты еске алу концерті өтті.
Қазақтың күй өнерінде Құрманғазы, Дәулеткерей секілді ұлылардың сара жолын жалғап, өзі де тұғырлы тұлғаға айналған Қаршыға ағамыздың орны бөлек. Жасынан әкесінің тәлімін алып, он саусағынан өнер тамған күйші бала атанған оны Құрманғазы оркестріне Нұрахмет Жорабеков жетектеп алып келген. Ол осы оркестрде қызмет істей жүріп, консерваторияның халық аспаптары факультетін тәмамдайды. 1973 жылдан күй атасы атындағы оркестрдің бас домбырашысы, 1988-1991 жылдары оркестр дирижері болды. 1991 жылдан Құрманғазы консерваториясында домбыра кафедрасының меңгерушісі болып, шәкірт тәрбиеледі. Ұлғатты ұстаздық қызметімен бірге, Құрманғазы, Дәулеткерей, Махамбет, Дина Нүрпейісова және т.б. күйшілердің шығармаларын нотаға түсіріп, талай ғасыр ұрпақ кәдесіне жарайтын мұра қалдырды.
Атақты күйшіге арналған мазмұнды іс-шара Қаршыға ағамыздың Алматыдағы өзі тұрған үйіне ескерткіш тақтаның қойылуымен басталды. Оған Мәдениет және спорт вице-министрі Нұрғиса Дәуешов, Алматы қаласы Мәдениет басқармасының басшысы Ғани Майлыбаев, Құрманғазы оркестрінің директоры Медет Қуанышев, Құрманғазы атындағы
консерватория ректоры Арман Жүдебаев қатысып, талантты тұлғаның адами болмысы мен өнері туралы естеліктерімен бөлісті.
Одан кейін тағылымды кеш Қаршыға ағамыз 25 жыл қызмет істеген Құрманғазы атындағы Қазақ ұлттық халық аспаптары оркестрінің концертіне ұласты. Алдымен мұнда Мәдениет және спорт министрі Ақтоты Райымқұлованың құттықтауы оқылды. Кеш барысында даңқты күйшінің «Күй ұран», «Ақ қайың», «Жер Ана», «Арпалыс», «Жұлдызым» және т.б бірегей туындылары орындалып, жиналғандар ардақты азаматтың асыл мұрасымен тағы бір қауышып, әсерлі көңіл күйге бөленді.
Сонымен бірге жұртшылық кеш аясында Қаршыға Ахмедияровтың өнегелі өмірінен сыр шертетін суреттері мен күйшінің жеке тұтынған бұйымдары, қасиетті қара домбырасы және мемлекеттік марапаттары қойылған көрмені тамашалады.