Әзербайжанның Министрлер кабинеті жанындағы жедел штаб «Ерекше карантиндік режимді ұзарту және кейбір шектеулерді алып тастау жөніндегі шаралар туралы» қаулыға тиісті өзгерістер енгізді, деп хабарлайды Egemen.kz.
Өзгерістерге сәйкес, 2021 жылдың 1 шілдесінен бастап COVID-паспорттары бар деген талап қойылған еңбек және қызмет көрсету қызметкерлерінің кем дегенде 80%-да COVID-19-дан алғашқы дозада вакцина алуы немесе COVID-19-ға қарсы иммунитет туралы сертификаты, сонымен қатар 2021 жылдың 1 тамызынан бастап COVID паспорты болуы керек.
1 шілдеден бастап Әзербайжанда 150-ден аспайтын адамның қатысуымен той, туған күндер өткізуге болады. Мерекелік іс-шараларды өткізудің негізгі шарты – 18 жастан асқан барлық қонақта COVID-19-паспортының болуы. Қызмет көрсететін персоналдың (музыканттардан басқа) медициналық маскаларды, қолғаптарды және басқа да жеке қорғаныс құралдарын мерекелік рәсімде қолдануы міндетті.
Елдің министрлер кабинетінде атап өткендей, бұл қадамдар соңғы айларда COVID-19 жұқтыру жағдайларының азаюына және жалпы эпидемиологиялық жағдайдың оң жаққа өзгеруіне байланысты.
Ведомство вакциналау процесін табысты жүргізу ерекше карантин режимі аясында енгізілген бірқатар шектеулерді алып тастауға қосымша мүмкіндіктер беретінін айтты. Естеріңізге сала кетейік, соңғы тәулікте Әзербайжанда коронавирус инфекциясын жұқтырудың 28 жағдайы, өлімнің 1 жағдайы анықталды.