Футболдан Еуропа біріншілігінің D тобындағы екі бірдей тартысты бәсекені тамашаладық. Лондонда Англия мен Чехия құрамалары шеберлік байқасса, Глазгода Шотландия мен Хорватия командалары күш сынасты.
Әйгілі «Уэмбли» стадионында өткен матчта қалай да өз тобында бірінші орын алуды мақсат тұтқан ағылшындар жасыл алаңға алғашқы минуттардан Джордан Пикфорд, Кайл Уокер, Харри Магуайр, Джон Стоунз, Люк Шоу, Бакайо Сака, Калвин Филлипс, Деклан Райс, Джек Грилиш, Рахим Стерлинг және Харри Кейн сынды ең үздік ойыншыларын шығарды. Чехия құрамасының бас бапкері мына жігіттерге сенім артты: Томаш Вацлик, Владимир Цоуфал, Томаш Калас, Ондржей Челустка, Ян Боржил, Лукаш Масопуст, Томаш Соучек, Томаш Холеш, Владимир Дарида, Якуб Янкто және Патрик Шик.
Ойынды бірден екпінді шабуылмен бастаған алаң иелері 12-минутта көздеген мақсатына қол жеткізді. «Манчестер Ситидің» жұлдызы Рахим Стерлингтің бағыттаған добына Томаш Вацлик тосқауыл қоя алмады. Содан кейін де бәсеке өте шиеленісті өтті. Бірақ таблдоғы есеп өзгеріссіз қалды – 1:0.
Глазгода өткен кездесуде алғашқы голды қонақтар соқты. 17-минутта Никола Влашич нысананы дәл көздеді. Бірінші кезең аяқталар тұста Каллум Макгрегор таразы басын теңестірді. Бірақ жергілікті жанкүйерлердің қуанышы ұзаққа созылмады. Үзілістен кейін басымдыққа ие болған хорватиялықтар қатарынан тағы екі рет мергендік танытты. 62-минутта Лука Модрич алыстан соққы жасап, допты торға дәл түсірсе, 77-минутта Иван Перишич бәсекенің соңғы нүктесін қойды – 1:3.
Сөйтіп жеті ұпайды олжалаған Англия өз тобында бірінші орынды иеленді. Хорватия мен Чехия мәреге бірдей жетті. Екеуінде де төрт ұпайдан. Қосымша көрсеткіштерінің арқасында хорваттар екінші сатыға жайғасса, чехиялықтар үшінші орында қалып қойды. Бірақ соған қарамастан Ярослав Шилгавы шәкірттері Еуро додасының келесі кезеңіне жолдама алды.
Ал Шотландия үш кездесудің екеуін өз отанында өткізгеніне қарамастан ең соңғы орынды қанағат тұтты.