Ж.Досмұхамедов атындағы Өлеңті орта мектебінде облыс жастары бас қосып, Кеңес Одағының Батыры Бауыржан Момышұлының 100 жылдығына арналған шара өткізді.
“Сырым жастары” жастар қоғамдық бірлестігі мен “Жас Отан” жастар қанатының аудандық бөлімшесі ұйымдастырған “Өрлікпен өрілген өмір” атты облыстық ғылыми-тәжірибелік конференция барысында үш ай бойы жинақталған жастар жұмыстарының қорытындылары шығарылды. “Бауыржан Момышұлы тұлғасының әдебиетте бейнеленуі”, “Бауыржан Момышұлы – елшіл ер, ұлтжанды тұлға, қыран қайраткер”, “Бауыржан Момышұлының жазушылық қыры” аталымдары бойынша үздіктер анықталып, олар дипломдармен, ақшалай сыйлықтармен марапатталды.
Самара қаласынан келген Зоя Әсімова майдан жылдарында Қазақстанда құрылған №100 және 101-бригада сарбаздарының тағдырына қатысты үш жылдан бері жүргізіп келе жатқан жұмысының нәтижесімен, алдағы жоспарларымен таныстырды. Бауыржан Момышұлы туралы “Ақиқат пен аңыз” атты роман жазған Әзілхан Нұршайықовпен ұялы телефонмен байланысқа шығу арқылы майдангер жазушы жастарға игі тілегін жеткізді.
Темір ҚҰСАЙЫН, Батыс Қазақстан облысы, Сырым ауданы.