1991 жылы еліміз тәуелсіздік алған сәттен бастап, біздің республика әлемнің 130 мемлекетімен дипломатиялық қарым-қатынас орнатып үлгерді және бірнеше халықаралық іргелі ұйымдардың абыройлы мүшесі болды. Бүгінгі таңда Орталық Азия мен Қазақстан аймағы әлем геосаясатында ерекше мәнге ие болып отыр.
Екпінді даму динамикасының арқасында Қазақстан оза дамыған өзге мемлекеттердің ірі трансұлттық корпорацияларының назарына ілігіп, олармен де тығыз байланыс орнатып келеді. Себебі біздің еліміз Орталық Азиядағы географиялық сипаты бойынша ең ауқымды мемлекет қана емес, экономикалық әлеуеті тұрғысынан да көшбасшылық тізгініне ие. Сондай-ақ еліміздің болашақтағы даму мүмкіндіктерінің мол екенін де естен шығармаған жөн.
Бүгінгі күні біздің дипломатиялық саясаттағы басымдығымыз бірінші кезекте Ресей, Қытай, АҚШ, Еуропа Одағы және Орта Азия аймағындағы Өзбекстан, Қырғызстан, Тәжікстан, Түрікменстан мемлекеттерімен, сол сияқты Әзербайжан, Түркия және күллі Ислам әлемімен экономикалық қарым-қатынастарды барынша дамыту және Түркітілдес мемлекеттер ынтымақтастық кеңесінің аясында түркі әлемімен мәдени байланыстарымызды нығайта түсу болып отыр.
Бұл орайда назарда болатын басты нысана мынау: біз қандай да бір экономикалық, саяси немесе мәдени байланыстарды күшейтуге тырысқанда біреулерге қауіп төндіру немесе қайсыбіреулерді қорқыту-үркіту үшін емес, керісінше ешкімнен қорықпас үшін және күллі әлеммен тату-тәтті қарым-қатынас жасап, қолдан келген шаралардың бәрін де бейбіт жағдайда, яғни дипломатиялық жолмен іске асыруды көздейміз.
2001-2002 жылдары Ұлыбританияда, Ирландия Республикасында және Норвегия Корольдігінде Төтенше және өкілетті елші болған кәсіби маман ретінде еліміздің дипломаттарын Қазақстанның дипломатиялық қызметі күнімен құттықтай отырып, ойларында жүрсін деген ниетпен бірер ұсыныс айтқым келеді.
Біріншіден, біздің елшілеріміз бірінші кезекте экономикалық дипломатияға ең үлкен басымдық бергені абзал. Нақтырақ айтқанда, экспортқа не шығара алатынымызды, шетелдік трансұлттық корпорациялар біздің экономикамыздың қай саласына инвестиция салса, екі жақтың да ұтатынын жатпай- тұрмай дәріптеуі керек.
Екіншіден, біздің шет мемлекеттерде қызмет атқарып жүрген дипломаттарымыз бен консулдарымыз сол елдерден өмірдің барлық саласы бойынша, атап айтар болсақ, экономика саласынан, әлеуметтік саладан, бизнес саласынан, банк және қаржы жүйесінен, озық мәдениетінен, озық білім саласынан, ғылым мен технологияларды өндіріске енгізу тәжірибесінен, шағын немесе орта бизнестің майын ішкен көшбасшыларынан, денсаулық және спорт саласынан не үйренуге болады, неден жиренуге болады деген сияқты дүниелерді дәріптеулері керек.
Ол үшін тек елшілер ғана емес, елшіліктегі дипломаттар да, консулдар да жоғарыда аталған салаларды зерттеп-зерделеп, терең мазмұнды аналитикалық мақалалар мен эсселер жазып, оларды үзбей республикалық бұқаралық ақпарат құралдарында жариялап тұруы керек.
Әділ АХМЕТОВ,
елші-дипломат, Қазақстанның еңбек сіңірген қайраткері, Халықаралық жоғары мектеп ғылым академиясының академигі