Қазақстанның Еңбек Ері Юрий Владимирович Пя жетекшілік ететін Ұлттық ғылыми кардиохирургия орталығы – еліміздегі заманауи емдеу мекемелерінің бірі. Германия, Италия, Бельгия, Франция, АҚШ, Түркия, т.б. елдердің жетекші клиникаларымен тығыз серіктестік қарым-қатынас орнатқан клиника ашылғалы мұнда жүрекке мыңдаған оталар жасалып, екі сырқаттың жүрегі ауыстырылды. Төменде назарларыңызға ұсынылып отырған лебіздер осы орталықтың қызметіне деген ел ризашылығы екені даусыз.
Қазақстанның Еңбек Ері Юрий Владимирович Пя жетекшілік ететін Ұлттық ғылыми кардиохирургия орталығы – еліміздегі заманауи емдеу мекемелерінің бірі. Германия, Италия, Бельгия, Франция, АҚШ, Түркия, т.б. елдердің жетекші клиникаларымен тығыз серіктестік қарым-қатынас орнатқан клиника ашылғалы мұнда жүрекке мыңдаған оталар жасалып, екі сырқаттың жүрегі ауыстырылды. Төменде назарларыңызға ұсынылып отырған лебіздер осы орталықтың қызметіне деген ел ризашылығы екені даусыз.
Қымбатты Юрий Владимирович!
Сізге ұлым Еркінбек Шаяхметұлының жүрегіне ота жасап, жанын аман алып қалғаныңыз үшін алғыс айтамын. Сіз талайлардың өміріне арашашы боп жүрген жансыз. Еңбегіңіз жана берсін.
Бәрі де қолында ғой Жаратқанның,
Дәрігер, шипалы екен алақаның.
Алдымен Аллам қолдап, өзің болып,
Қайта өмірге келгендей балапаным.
Керегі дәрігерге төзім-ерік.
Жасадың құлыныма көзсіз ерлік.
Қолымнан келетіні өзіңе арнап,
Сыйладым аз да болса өлең өріп.
Төлеухан АБЫЛҚАСЫМҚЫЗЫ.
Ұлттық ғылыми кардиохирургия орталығының басқарма төрағасы Юрий Пяға қазан айының 24-інде оң және сол жақ қарыншаны имплантациялау бойынша өткізілген ота үшін алғыс айтамыз. Сіздің отандық медицинаға сіңіріп жатқан өлшеусіз еңбегіңіз, жоғары кәсібилігіңіз бен шеберлігіңіз бір бөлек, жаныңыздан төгілген шуақтың өзі науқастың айығуына үлкен сеп болады деп есептейміз. Осында болған күндерде біз сіздің және өзіңіз басқарып отырған ұжымның тек жақсы қырларына ғана куә болдық. Әрқашан да еңбектеріңіздің жемісін көре беріңіздер. Қазақстанның «Еңбек Ері» атағын алуыңыз да сол жемісті еңбектің нәтижесі деп ойлаймыз. Жаңа жыл мерекесі құтты болсын! Өзіңізге және туыстарыңыз бен жақындарыңызға ұзақ ғұмыр тілейміз!
Александр ОНОПРИЕНКО,
Любовь ОНОПРИЕНКО.
Қымбатты Юрий Владимирович!
Ұлым Мандаев Қайратқа көрсеткен көмегіңіз үшін отбасымның атынан алғыс айтуды жөн көріп отырмын. Ұлым мамырдың 12-сінде санитарлық авиация көмегімен Ақтөбе қаласынан Астанадағы сіз басқаратын орталыққа ауыр жағдайда жеткізілген болатын. Оны ажалдан арашалап қалу үшін үлкен еңбек жасадыңыз. Сіз тек менің балама ғана емес, қолыңыз тиген науқастардың барлығына да жақсылық жасап келесіз. Әрқашан да табысты болыңыз!
Амангелді МАНДАЕВ,
Ақтөбе қаласының тұрғыны.
Жұбайым Әділжан Байменге жасалған отаның сәтті өткені үшін орталықтың бүкіл ұжымына отбасымның атынан алғыс айтамын. Орталықтағы барлық ауру жандар жазылып шықсын деп тілеймін. Адамдар күндерін ауруханада төсекке таңылып емес, өздеріне қымбат жандардың қасында өткізсін. Сол үшін отбасылық береке мен тыныштық, махаббат пен мейірім әрбірімізге де жолдас болсын. Ал сіздердің жұмыстарыңыз алға баса берсін! Елдің алғысын ала беріңіздер!
Байменовтер отбасы.
Біз Қазақстанда осындай орталықтың болғаны үшін қуанамыз. Осындай орталықта сіз секілді адамның және айналаңызда кілең талантты да талапты, білікті жастардың жүргені қандай ғанибет. Сіз әр науқастың кеудесіне үміт отын тұтатып, көптеген адамдарға өмір сыйлап жүрсіз. Сол үшін сізге алғысымды айтамын. Елімізде әрқашан тыныштық болсын.
Мизам МҰХАМБЕТОВ,
Қостанай облысының тұрғыны, зейнеткер.
Ұлттық ғылыми кардиохирургия орталығында емделіп шықтым. Орталық қызметкерлерінің жұмысына көңілім толды. Мекеменің жұмысы бұдан да өсіп өркендей берсін. Юрий Владимирович бастаған барлық ақ халатты абзал жандарға алғыс айтамын. Еңбектеріне сәттілік пен табыс тілеймін. Жеке өмірлері бақытқа толы болсын!
Нұргелді ЖЕКСЕМБАЕВ.