Тамылжыған табиғатты саф күйінде сақтаудың маңызы өте зор. Таяуда «Киелі табиғат» акциясы аясында облыстық туризм басқармасы мен облыстық жастар ресурстық орталығы білек біріктіріп курортты аймақта эко-сенбілік өткізді.
Жадыраған жаз айларында бұл өңірге ат ізін салатын, мәңгі жасыл қарағайы мен қолдың саласындай ақ қайыңы қаулап өскен орманды алқабын емін-еркін аралап, саф ауасын көкірек кере құмарта жұтатын келімді-кетімді кісі аз емес. Туристер дүмеп келген соң әдейі жасамаса да, ішкі мәдениеттің олқылығынан табиғаттың ай жүзіне кіреуке түсіп жататыны да бар. Акцияның басты мақсаты – жас толқынды тәрбиелеу. Экологиялық мәдениеттің дағдыға айналуына күш салу. Сайып келгенде табиғатты күтіп, оған жанашырлықпен қарап, қашанда қамқор болуды жетелеріне жеткізіп, сүйектеріне сіңіру.
Ізгі ниетпен әдіптелген акцияға облыс орталығы мен Бурабай ауданының еріктілері қатысты. Сөз арасында жастардың бойында туған өлкемізді күтіп ұстайықшы, табиғатқа адамдар залал келтірмесінші дейтін ниеттің бар екендігін разылықпен айта кеткеніміз орынды болмақ. Қатысушылар екі топқа бөлініп, тазалайтын аумақтарының кең болуын қамтамасыз етті. Нәтижесінде, жүзден астам қапқа қоқыс жиналды. Осыдан-ақ кейбіреулердің табиғатты аялай бермейтіндігін аңғаруға болады. Еріктілер тобы қоқыс жинаумен қатар, демалушылар арасында түсінік жұмыстарын да жүргізді.
– Бұл шараның өзгелерге үлгі болатындығы сөзсіз. Алдағы уақытта табиғат жанашырларының қатары бүгінгіден де көбейсе екен, – дейді об- лыстық еріктілерді қолдау орталығы фронт кеңсесінің үйлестірушісі Әсия Қанашева.
Бір мезеттік іс-шара барысында ауқымды іс тындырылғандығын айта кеткен жөн. Ең бастысы, жас толқын туған өлкенің табиғатына жанашыр. Жақсы іс жалғасын тауып, сәтімен сабақталып жатса, ойға алған шаруаның оңынан оралғаны емес пе?!
Ақмола облысы