Түркия оппозициясы премьер-министр Реджеп Тайип Эрдоганның ұлын жемқорлыққа қатысы бар деп айыптап отыр. Бұл туралы ИТАР-ТАСС хабарлады.
Ирактің «Ас- Сумария» телеарнасы мәлім еткендей, Түркия БАҚ өкілдеріне үкімет басшысының ұлы Билял Эрдоганның жылжымайтын мүлікке қатысты күмәнді келісімдер жасағаны және Ясин әл-Кады атты саударабиялық кәсіпкермен байланыс орнатқаны жөнінде ақпараттар келіп түскен. Соңғысын «әл-Каидаға» көмек көрсетті деген күдікпен БҰҰ Қауіпсіздік кеңесі халықаралық лаңкестікке қолдау көрсететін адамдар тізіміне енгізіпті. Оппозиционерлер олардың қарым-қатынасын тексеруді талап етіуде.
Айта кетейік, қазіргі таңда Түркияда жемқорлыққа қарсы «үлкен пара» атты ауқымды операция жалғасып келеді. Күні бұрын 16 аймақтың басшылары жұмысынан босатылса, апта басынан бері 350-ден астам полицей қызметінен кеткен.
Айдар Өрісбаев.
Дереккөз: Itar-tass.com
Фото: Kcblog.info