ЕЛДЕСТІРМЕК – ЕЛШІДЕН

Кеше Ақордада Мемлекет басшысы Нұрсұлтан Назарбаев жаңадан тағайындалған Қазақстан Республикасындағы елшілерден Сенім грамоталарын қабылдады, деп хабарлады Қазақстан Республикасы Президентінің баспасөз қызметі. Президентке Ұлыбритания және Солтүстік Ирландия Король­ді­гінің Төтенше және өкілетті ел­шісі Дэвид Джон Моран, Беларусь Республикасының Төтенше және өкілетті елшісі Валерий Брылев, Иран Ислам Республикасының Төтенше және өкілетті елшісі Горбан Сейфи, Түркіменстанның Төтенше және өкілетті елшісі Мақ­тымқұлы Ақмырадов Сенім грамо­таларын тапсырды. Рәсімде сөз алған Н.Назарбаев елшілерді дипломатиялық қызмет­те­рінің басталуымен құттықтады және олардың қызметі екіжақты қа­рым-қатынастарды жан-жақты кеңейтуге және тереңдетуге, олар­дың ұзақ мерзімдегі дамуын қам­та­масыз етуге айтарлықтай ықпал ететініне сенім білдірді. Мемлекет басшысы Қазақстан еліміздің ірі сауда серіктесі болып табылатын және қазақстандық эко­номикаға тіке инвестиция тарту кө­лемі жағынан төртінші орынға ие Ұлыбританиямен ынтымақтастыққа үлкен мән беретінін атап өтті. – Лондондағы қазақстандық-бри­таниялық сауда-өнеркәсіп кеңе­сінің келесі отырысының күн тәр­ті­біне екіжақты байланыс­тарды кеңейту және тереңдету жө­ніндегі тиімді шаралар енгі­зілуі қажет деп есептеймін, – деді Н.Назарбаев. Президент Қазақстан мен Бела­русь ынтымақтастығы жаңа сапалы деңгейге көтерілетінін атап өтті. – Біз БҰҰ, ЕҚЫҰ, ТМД, ЕурАзЭҚ, ҰҚШҰ аясында халық­ара­лық аренадағы ынтымақтас­тық­ты белсенді жалғастырып келеміз. Біздің Кеден одағын құру бойынша бірлескен жұмысымызды ерекше атап өткім келеді. Бірыңғай эко­но­микалық кеңістікті қалыптастыру жөніндегі жұмыстарды келешекте бірлесе отырып белсенділікпен жүргіземіз деген үміттемін, – деп атап өтті Мемлекет басшысы. Қазақстан Иранмен дәстүрлі достық және серіктестік қарым-қатынастарға үлкен мән береді. – Біз халықаралық аренада, со­ның ішінде ИКҰ, ШЫҰ және ЭҚҰ тәрізді ұйымдардың аясында та­бысты байланыс орнатып отырмыз. Қазақстанда Азиядағы өзара ық­палдастық және сенім шаралары жө­ніндегі кеңесті, сондай-ақ Әлем­дік және дәстүрлі діндер көшбас­шы­лары съезін шақыру жөніндегі бас­таманы Теһранның қолдауы жо­ғары бағаға ие, – деді Президент. Қазақстан сондай-ақ Түркі­мен­станмен өзара тиімді ынтымақ­тас­тықтың одан әрі дамуына қызы­ғушылық танытады. – Екі елдің арасында бірлескен ірі жобалар табысты жүзеге асы­рылуда – біз мұнай-газ секторын­да­ғы ынтымақтастық туралы келіс­тік, біз Түркіменстан арқылы Иран­ға жол салудамыз – бұл кө­лік-транзит кешенін құрауда ма­ңызды. Сауда-экономикалық және мәдени-гуманитарлық ынтымақ­тас­тық дамитын болады, – деп атап өтті Н.Назарбаев. Брифингте сөз алған Дэвид Джон Моран Қазақстанда елші бо­лып қызмет атқару өзі үшін үлкен құрмет екеніне тоқталды. – Британия Қазақстанмен қа­рым-қатынастарды дамытуға үлкен мән береді. Екі елдің арасында саяси, іскерлік, білім беру, мәдени және әскери салалардағы екіжақты байланыстар кең ауқымда дамып келеді, – деді британиялық елші. Беларусь Республикасының елшісі Қазақстанның табыстарына жоғары баға берді. – Менің елші қызметіндегі жұмысым біздің елдердің халқын одан әрі жақындастыруға бағытта­латын болады деп үміттенемін, – деді Валерий Брылев. Горбан Сейфи Қазақстан мен Иран екіжақты форматта, өңірлік әрі халықаралық ұйымдар түрінде өзара қарым-қатынастарды табыс­ты жүргізіп отырғанын атап өтті. – Иран мен Қазақстан ара­сын­дағы қарым-қатынастар анағұрлым белсенді дамуы үшін өз қызметімді белсене атқарамын деп ойлаймын, – деп атап өтті Иран Ислам Рес­публикасының елшісі. Түркіменстан елшісі Қазақстан мен Түркіменстан арасында бірде-бір ше­шімін таппаған немесе проб­лема­лық мәселе жоқ екеніне назар аударды.