Жұртым деп жан ұшырған

Жолды жауып тастаған ақ түтек боранның астында тізеден қар ке­шіп, көліктердің алдында аласұра жү­гіріп жүрген сары жолақты күр­телі полицейді жүргізушілердің бірі ав­торегистраторға түсіріп алған сы­ңайлы. Бұл бейнежазба сол күні-ақ әлеу­меттік желіге таралып кетті.

Қарлы боран көтерілген 18 ақпан күні қаланың ішінде қалыпты қызме­тін атқарып жүрген аға лейтенант кезекші бөлімнен Юбилейный шағын ауданының маңайындағы жол-көлік оқиғасы болған жерге жет деген нұс­қау алады. Жаңа шағын ауданның ма­ңа­йындағы боранның екпіні қала ішіндегіден екі есе күшті. Дүлей боран таңертең ғана сайрап жатқан жолды жауып тастаған. Межелі шағын аудан­ға жеткен Амантай қалаға кіріп жат­қан көліктер легінің алдында бірнеше автокөліктің жол шетіне шығып, қар­ға батып қалғанын көреді. Олар ке­йін­гілердің жолын бөгеп, ұзыннан-ұзақ көлік кептелісі пайда болыпты. Полиция аға лейтенанты сол жердегі жүргізушілердің көмегімен жол шетіне шығып қалған көліктерді қолмен ите­ріп шығарып, жол қозғалысын ретке келтірмек болады. Бірақ көлік ішін­дегілер жолдан адасып, шетке батып қала берген соң, әр көліктің алдына түсіп, жаяу жүгіріп жүріп жол көр­сетуіне тура келді.

– Өйткені жол қалың қардың ас­тында қалды, оның үстіне таяқ тастам жер көрінбейді, қайда қарасаң да алай-дүлей ақ түтек. Мұндай қысылтаяң сәтте көп ойланып тұруға болмайды. Ұзын-сонар кезекте тұрғандай, орнынан жылжымай тұрған кептелісті қалайда жөнге келтіру керек. Бірінші тұрған көліктің алдына түсіп, жүргізушіге қол бұлғай отырып жол көрсете бастадым. Содан көлік жылдамдығын үдете бастаған соң, жүгіруге тура келді. Ол көліктің со­ңы­нан өзге көліктер де жылжи бастады. Осы­лайша, жолдың қауіпті тұсынан шы­ғып, мен – жаяу, жұрт көлікпен үш шақы­рымдай жол жүріп, қаланың ішіне кір­дік. Көлік тізгінінде отырған адамдар үстім­дегі сары жолақты күртені ғана көріп отырыпты, – деді полиция инс­пекторы.

Ақпанның ақ боранымен арпалы­сып жүріп, алпыс шақты көлікті қар құр­сауынан құтқарған Амантай осы­дан кейін көпшіліктің алғысына бөле­ніп, Ішкі істер министрлігінің «Құқық тәртібін қамтамасыз етуге қос­­қан үлесі үшін» медалін омырауы­на тақты. Ал облыстық Полиция депар­таментінің бас­шылығы қызмет­тік боры­шын мүл­тіксіз атқарған полицейге алғыс жария­лап, атаулы қолсағат табыс етті.

Осы орайда Амантайдың тағы бір ерлігін айтпай кетпеске болмайды. Оның өткен жылдың сәуір айында әріп­тесі Жанболат Жаутинмен бірге пат­рульдік қызметін атқарып жүріп, өртке оранған екі қабат үйдің ішінен 15 адамды аман-есен алып шыққанын көп­шілік әлі ұмыта қойған жоқ. Түн жарым­да қызыл жалынға орана бастаған үйдің қоршауынан секіріп түскен Амантай есікті теуіп сындырып, тарс ұй­қыда жатқан адамдарды оятып, ояна алмағандарын далаға көтеріп шығарған.

– Амантай бірінші болып кіріп кетті де, ең алдымен 5 жасар баланы алып шықты. Одан кейін өртеніп жатқан үйге мен де кірдім. Тілсіз жаумен арпалысып жүргенде үстіміздегі киміміз жанып, екеуміздің де қолымызды от қарып, күйік шалды. Амантай иығына дейін күйдіріп алды. Ет қызумен жүргенде оны елең қыла қоймадық, – дейді Жан­болат Жаутин.

Кейін Амантай мен Жанболатты іздеп тауып алған өрт шалған үйдің тұрғындары екі полицейге алғыстарын жаудырып, облыстық Полиция депар­таменті басшылығына оларды арнайы марапатқа ұсыну туралы өтініш біл­дірген. Көп кешікпей қос лейтенант Ішкі істер министрінің «Өртте көрсет­кен қайсарлығы үшін» медалімен мара­патталған.

Амантай Байжановты «Қазақстан­ның 100 жаңа есімі» жобасына осы жобаның өткен жылғы жеңімпазы Ди­нара Шүкіжанова ұсыныпты.

– Жобаның жеңімпазы болдың дегенді алғаш естігенде өз құлағыма өзім сенбедім. Қарапайым полиция қыз­меткерлерінің ішінде тұңғыш рет осын­дай құрметке бөленген мен ғана шы­ғармын. 30 сәуірде Нұр-Сұлтан қала­сында жеңімпаздарды ресми мара­паттау рәсіміне қатыстым. Бізді Мем­лекет басшысы Қасым-Жомарт Тоқаев құттықтап, баршамыздың ел игілігі үшін адал еңбек етіп, бұдан да жоғары табыстарға қол жеткізетінімізге сенім білдірді, – деді Амантай Байжанов.

Оның айтуынша, патрульдік қызмет барысында оқыс оқиғалар кездесіп тұрады. Ондайда қауіп-қатерге бас тігуге тура келеді. Былтыр 10 сәуірге қа­раған түні Амантайдың басынан дәл осындай тағы бір оқиға өткен еді.

Түн жамылған үш қарақшы облыс орталығындағы Амангелді көше­сінен «Текстильщик» саяжайына де­йін «Индрайвер» таксиіне тапсырыс бе­реді. 38 жастағы жүргізуші мінген «Лада Калина» автокөлігі келген соң, күдіктілердің екеуі – артқы орындыққа, біреуі жүргізушінің жанына жайғаса­ды. Такси межелі жерге келіп тоқтаған соң, артта отырғандардың бірі жүргізушінің мойнына арқан салып, ақша талап етіп, қылғындыра бастаған. Сәтін сал­ғанда, жүргізуші мойнын қиып бара жат­қан қыл бұраудан сытылып шы­ғып, полицияға хабарлап үлгереді. Абды­рап қалған қаскүнемдер көліктегі екі ұялы телефон мен регистраторды алып, із суытады.

Бұл туралы хабар алы­сымен «Текстиль­щик» шағын ауда­ны­на жа­қын маңай­да қоғамдық кү­зет қыз­метінде жүрген полиция аға лей­тенант­тары Амантай Байжанов пен Жә­ні­бек Мырзахметов дереу оқиға орны­на жетеді. Алдымен жәбірленушіден кү­дік­тілердің түр-тұл­ғасы, бет-әлпеті ту­ралы мәлімет алып, оны барлық кү­зет бекетіне жіберген полиция пат­рулі үш қарақшының ізіне түседі. Жақын маңайдағы қуыс-қалтарыстың бірін қалдырмай сүзіп шыққан тәртіп сақшыларының көлігі Қорған көшесі­не бұрылады. Анадайда суыт жүріп бара жатқан екі адам полиция көлігін көре сала қаша жөнелген. Алайда екеуі де алысқа ұзай алмады, тәжірибелі тәртіп сақшылары қуып жетіп, көзді ашып-жұмғанша екеуінің де қолына кісен салып үлгереді. Күдіктілер поли­ция бөліміне жеткізіледі. Сәлден соң бөлімшеге келген такси жүргізушісі екі қарақшыны бірден таныған. Із суытып үлгерген үшінші қарақшы кейін өз пәтерінде ұсталған. Күдіктілердің үшеуі де Қостанай облысының бұрын сотталған 20-24 жас шамасындағы тұр­ғындары бо­лып шықты. Қазір қарақ­шылар темір тор­дың арғы бетінде отыр. Ал полиция аға лейтенанты Амантай Байжанов қоғам­дық тәртіп күзетіндегі қарбалас қызме­тін жалғастырып жүр.

– Жұбайымның есімі Гүлнар, екеу­­міз Арслан есімді ұл тәрбиелеп отыр­мыз. Қызмет бабымен жүріп, үйде көп бола алмай қаламын. Гүлнар мұн­дайға әбден үйренген. Мен оған поли­цейдің жары бесаспап болу керек деп әзіл­деймін. Бірақ қызметтен босай қалсам, отбасыммен бірге табиғат аясында, Тобыл жағасында таза ауада серуендеп, бос уақытымды пайдалы өт­кізуге тырысамын. Бірақ мұндай сәттер өте сирек. Өйткені жұмыс қауырт, – дейді тәртіп сақшысы.

Қостанай облысы