Облыс әкімі Қанат Бозымбаевтың қатысуымен өткен облыстық мәслихаттың сессиясында балалардың құқығын қорғау жөніндегі басқарма облыстық білім беру басқармасымен; қоршаған ортаны қорғау және жер қойнауын пайдалану, энергетика және тұрғын үй-коммуналдық шаруашылығы; кәсіпкерлік және сауда; туризм, мәдениет, мұрағаттар және құжаттама бөлімдерінің бірігетіні, құрылыс басқармасы жолаушылар көлігі және автомобиль жолдары басқармасына қосылатыны хабарланды.
Облыс әкімі Қанат Бозымбаевтың қатысуымен өткен облыстық мәслихаттың сессиясында балалардың құқығын қорғау жөніндегі басқарма облыстық білім беру басқармасымен; қоршаған ортаны қорғау және жер қойнауын пайдалану, энергетика және тұрғын үй-коммуналдық шаруашылығы; кәсіпкерлік және сауда; туризм, мәдениет, мұрағаттар және құжаттама бөлімдерінің бірігетіні, құрылыс басқармасы жолаушылар көлігі және автомобиль жолдары басқармасына қосылатыны хабарланды.
Сессия отырысында хабарланған мұндай қадам жалпы, мемлекеттік бағдарламаларды жүзеге асыратын басқармалар үшін жасалып отырғаны түсінікті. Әйтпесе, бұған дейін облыстық әкімдік жұмыс көрінбейтін, аты дардай басқармалар ашып, әркімге бір үлестірумен келді. Қолда тұрғанда қонышынан басқандар үнемшілдікті, ысырапшылдыққа жол бермеуді, талап пен тәртіпті ұмытқандай. Бұдан халыққа келген бес тиын да пайда жоқ.
Енді басталған оңтайландыру жүйесі облыстағы алда атқарылар жұмыстар үшін тиімді жол. Мысалы, облысқа дәл осы қазіргі уақытта туризм басқармасы қажет пе еді?.. Біз әуелі әлеуметтік салаларды – ауылдардағы жол, ауызсу, денсаулық сақтау, мәдениет саласы, мектеп, балабақшаларды толық жөнге келтіріп, халықтың көңілінен шығып алайық та. Ауылға тұрғын үйлер салайық. Жастар ауылға барсын. Лебяжі ауданында дәрігерлер түгелдей зейнет жасына жетіп қалыпты. Ал, туризм басқармасы, тіпті, ашылғанына бір ай уақыт болмай жатып-ақ, қыруар қаражат жұмсап халықаралық форум ба, көрме ме өткізіп те үлгерді. Мұрағатшы-құжаттамашылар да бір басқарманың тізгінін ұстап отыр еді, енді мәдениет басқармасына қосылып оңтайланды. Бұған дейін мұрағатшы-құжаттамашылар өз басқармаларындағы мұрағат-құжаттамаларға байланысты туындаған біраз мәселелерді Мәдениет және ақпарат министрлігіне жеткізе алмай жүріп еді, енді іздегенге сұраған. Ал, облыстағы жолдар жергілікті халықтың уайымына айналды. Жолсапарларға баратын тілшілер – біздердің де басты қорқынышымыз жолдың жоқтығы. Лебяжі ауданының ауылдарының тұсымен өтетін халықаралық Омбы – Майқапшағай бағытының екі көлік сыймайтын тап-тар жолынан күндіз өтіп алмасаң, түнде жүру аса қауіпті. Жуырда ғана осы жол бойында бір отбасы түгелімен қаза болды. Ауылдарға жолға шықпай тұрып әуелі Тегістікке жете аламыз ба, Алғабастың тұсындағы республикалық жолға қарасты айналма жөнделді ме өзі, Мыңкөлдің жолы шұңқырдан арылды ма деп сұрап жатамыз. Ендігі бар үміт құрылыс, жолаушылар көлігі және автомобиль жолдары атты біріккен басқармада. Қоршаған ортаны қорғау мен жер қойнауын пайдалануды реттейтін басқармаға Баянауылдың ауылдары отырған Майкөбе, Талдыкөл, Сарыкөл, Керегетас кеніштеріне, Майқайыңға барып қайтса жұмыс жетеді. Сол жерлердегі ауылдар сусыз, жолсыз, кеніштердің көк түтіндерінің ортасында күл ортасында қалды. Қоршаған ортаны қорғаймыз деп жар салғанда сондаймыз. Сондықтан, облысқа жаңадан келген әкім Қанат Бозымбаевтың бастамасымен саны бар, сапасы жоқ басқармаларды біріктіру туралы оңтайландыру жүйесі қолға алынды. Енді, басқарма басшыларды қысқарту есебінен нақты жұмыс атқаратын мамандар саны артады. Бұл 2014 жылға арналған облыстық бюджеттің әкімшілік шығындарын 53 миллион теңгеге азайтатын көрінеді. Ал біріктірілген басқармаларда басшыларға төленетін жалақы бойынша қазынаның 16 миллион теңгесі, қызмет көліктерін пайдалану жағынан 36 миллион теңге үнемделмек. Шенеуніктер жүретін көліктердің саны шамамен 30 пайызға дейін азаяды. Облыс әкімінің аппаратында 70 адам болса, оларға жүзге жуық адам қызмет көрсетіп келіпті.
Сондай-ақ, 14 бюджеттік бағдарлама да оңтайландырылады. Жекелеген мынадай әлеуметтік мәселелердің басымдылығы мен бірінші кезектілік сипаты ескеріле отырып, басымдылығы жоқ біраз шығындар қысқартылды. Айтпақшы, облыста екі облыстық және «Регион» деп аталатын облыстық жастар газеттерінің редакциялық ұжымдарын қарауына алған «Аналитикалық ақпарат орталық» ЖШС бар. Ал «Ертіс-Медиа Холдингі» АҚ аталмақшы екінші бір орталық аудандық газеттерді қосып, акционерлік қоғам жасамақшы көрінеді. Негізінде, талдамалық-ақпараттық бөлім, жалпы, аудандық газеттермен байланыс облыстық ішкі саясат басқармасының жұмысы саналатыны белгілі.
Енді бас-басына орталық, басқарма, холдинг, акционерлік қоғам құрғандар да облыста жүргізіліп жатқан Қанат Бозымбаев қолға алған оңтайландыру жүйесінен тыс қалмас деп ойлаймыз.
Фарида БЫҚАЙ,
«Егемен Қазақстан».
Павлодар облысы.