Неміс теміржолшылары сейсенбіге қараған түні бүкілхалықтық ереуілге шықты. Бұл туралы GDL кәсіподағының басшысы мәлімдеді. Кәсіподақ мүшелерінің 95 пайызы бұл қадамды қолдаған. Осыған байланысты жолаушылардың жүріп-тұруына кедергі келуі мүмкін. Теміржол қызметі мұны да ескеріп отыр.
GDL кәсіподағының басшысы Клаус Весельскийдің айтуынша, ереуілге алғаш болып бүкіл жүк пойыздарының қызметкерлері шықпақ. Олар сейсенбі күні кешкі 17:00-ден бастап шерулетеді. Содан кейін, сәрсенбі күні оларға жолаушылар пойыздарының қызметкерлері қосылады. Жаппай ереуіл жұмаға дейін созылады.
Кәсіподақ жалақыны 3,2 пайызға көтеруді және 600 еуро көлемінде бір реттік «коронавирус бонусын» төлеуді талап етіп отыр. Германиядағы теміржолға жауапты Deutsche Bahn операторы мұны қабылдаған жоқ. Компания пандемия басталғалы бері миллиардтаған шығынға ұшырады. Бұған таяуда болған су тасқынын қосыңыз. Қысқасы, Deutsche Bahn-ның шығыны шаш-етектен.
Deutsche Bahn қалааралық пойыздардың төрттен бір бөлігі ғана сәрсенбі мен бейсенбіде жүретінін, Берлин мен батыстағы қалалармен, сондай-ақ Гамбург пен Франкфурт арасындағы байланыстарға басымдық берілетінін хабарлады.
Компания жолаушыларды қажетсіз саяхаттан бас тартуға шақырды және әр орынға тапсырыс беру үшін коронавирусқа байланысты шектеулерді алып тастайтынын айтты.
Германия аумақтары қазір жазғы демалыста. Сондықтан саяхатшылар пойыз қызметіне жиі жүгінеді. Бірақ алдағы екі күнде темір жол қызметі бәсеңдеп қалатындықтан, жолаушылар сатып алған билетінің құнын қайтаруды талап етуі мүмкін.
Осылайша, GDL кәсіподағы өз мақсатына жетуі ықтимал. Ұйымға 35000 жұмыскер мүше. Бұған дейін кәсіподақ 2014 және 2015 жылдары сегіз рет жалпыұлттық ереуілге шығып, өз талаптарын орындатқан.