Вакцинаның толық компонентін алып үлгермеген студенттер жаңа оқу жылы басталған кезде оқу орны орналасқан аумақтағы медициналық ұйымдарда вакцина салдыра алады, деп хабарлайды Egemen.kz.
ҚР бас санитар дәрігері Ерлан Қиясовтың жаңа қаулысында вакцина салдырмаған студенттер оқу орны орналасқан аумақтағы медициналық ұйымдардың егу пункттерінде вакцинациялану керектігі айтылған.
Шетелдік студенттер болса, Қазақстан аумағына оқуға тұрғылықты елдің уәкілетті органы растаған COVID-19-ға қарсы вакцинациялаудың толық курсы болған жағдайда ғана жіберіледі.
«Шетелдік студенттер Қазақстан Республикасының Мемлекеттік шекарасынан өткеннен кейін 3 тәуліктен кешіктірмей ПТР әдісімен алынған COVID-19-ға тестілеудің теріс нәтижесі бар болған жағдайда күндізгі оқу форматына жіберілсін», деп жазылған құжатта.
Медициналық колледждер мен жоғары оқу орындарының білім алушыларына клиникалық базаларға, резидентура базаларына, денсаулық сақтау саласындағы білім беру ұйымдарының клиникаларына, университет ауруханасына, интеграцияланған академиялық медициналық орталыққа вакциналау паспортымен расталған COVID-19-ға қарсы вакциналаудың толық курсы бар болған кезде кіруіне рұқсат етіледі.