«Жартоғай глемпингі»

Танымал актрисаның еліміздің оңтүстік өңірлеріндегі қасиетті орындарды аралап, әулиелердің басына түнеген кезі болыпты.

– Мен қазақ даласын көрдім. Өмірімде табиғат көрінісінен тұң­­ғыш рет ғажайып сезімге бө­ленген сәтім осы болды. Тау да, су да, орман да керемет стихия ғой. Ал дала стихиясының жөні бөлек. Біз жеткілікті мөл­шер­­дегі жылдамдықпен жүріп отыр­дық. Жол бойы қарайған тау, қыл­тиған ағаш көрмейсің. Ұшы-қиыры жоқ жазық дала. Айнала қор­шаған көкжиекпен ғана бетпе-бет қаласың. Тақ бір мұхиттың табанында келе жатқандай керемет сезімге шомасың. Жап-жазық да­лада келе жатып кенет еңіске қа­рай құлдилай жөнелесің, – деп ор­ман қызы дала көрінісін тамсана еске алады.

Иә, көз ашқалы көргеніміз осы болғандықтан, бізге дала таңсық емес. Құла түзде қызығарлық ештеңе жоқ. Тауға шықсақ немесе теңізге түссек, жанымыз сергіп бір жасап қалар едік деп ойлаймыз. Даланың саф ауасын, мөп-мөлдір өзен-көлін, дарқан кеңдігі мен мүлгіген тыныштығын теңізден, орман-таудан мезі болған немесе айқай-шуға толы үлкен мегаполистерден шаршаған ақшалы жұрт табиғаттың керемет бір ға­жайыбы ретінде көретінін ескере бермейміз. Арлы-берлі толассыз ағылып жатқан көліктер мен пойыздардың терезесінен даланың келбетіне құр там­санып қаншама Ириналар өтіп жат­қанында шаруамыз жоқ. Қыр­ға қызыққан жұрт көп. Соны көреміз де, «туризмді дамыту керек еді» деп қоямыз. Бірақ соның тетігін әлі күнге дейін дөп басып таба алмай жүрміз.

Алайда кейінгі кезде ішкі туризмді дамытуды қолға алып, қанатқақты жобаларын жүзеге асырып жатқан азаматтардың қатары көбейіп келеді. Мысалы, Торғайдағы көшпелі қонақүй жоба­сының авторы Амандық Әмір­хамзинді алайық, біраз жыл­дар­дан бері көпшілікке Торғай төрінің тылсым табиғатын насихаттап, туристерді өңірге жетектегендей етіп әкеп жүрген елшіл азамат биыл «Жартоғай глем­пингі» деген жаңа жобаны қолға алып жатыр.

– Негізі біз бұған дейін де «Тыл­­­сым Торғайға тур» деген ­жобаны қолға алып көргенбіз. Басты мақ­сатымыз – мүмкіндігінше өңір­­дің туристік әлеуетін ашып көрсету, Қостанай облысының тең жартысын алып жатқан Тор­ғай даласында туризмнің дамуы­на ықпал ету. Енді жаңа ға­на бастап жатқан жобамызға «Жар­тоғай глемпингі» деп ат қойдық. Глемпинг болған соң туристерге көрсетілетін қызметтің бәрі ішінде, демалушылар не қалайды, соның бәрі дайын әрі ыңғайлы болу керек. Қазір осы деңгейге жетуге ұмтылып жатырмыз, – деді Амандық Әмірхамзин.

Амандықтың көздегені – бұ­рынғы қазақ ауылының үлгісін қайта қалпына келтіру. 10-12 киіз үйден тұратын шағын ғана қазақы ауыл тұрғызуды ойластырып жүр. Қазірдің өзінде Жангелдин ауда­нындағы Жартоғайға 4-5 үй тігіп қойған. Үй саны алдағы уақытта сұранысқа қарай көбейе береді.

– Дүниежүзілік жануарлар дүниесі деген қор бар. Соның бір жарнамасын кездейсоқ көріп қалдым. Олар Қазақстандағы кәсіпкерлерге қорықтардан елу шақырым қашықтықтағы жерлерден экономиканың балама көзі бола алатын жобаларды ұсынады екен. Сол жобаны көріп оларға өтінім тастадым, ол қабылданды. Одан кейін жұбайым екеуіміз Kazakh Tourism АҚ пандемия кезінде ішкі туризмді дамыту мақсатында ұйымдастырған онлайн академиясында оқып, жеті сертификатын алдық. Ол жер­де әр бағытта оқытады, мәселен, тур­­ды қалай ұйымдастыру керек, глем­пингті қалай жасау керек деген сияқты. Осы жеті курс­ты тәмамдаған соң, біз өзіміздің биз­нес жоспарымызды жасап, «Жангелдин ауданындағы Жар­тоғай глемпингі» деген жобамызды ұсындық. Нәтижесінде же­ңімпаз болып, одан кейін Kazakh Tourism бізді киіз үйден тігілген қонақүй бизнесімен таныстыру мақсатында Жетісу өңіріне ша­қырды. Бұл бизнес Алматы облы­сында жақсы дамыған екен. Көл­сай, Қайыңды көлінде болып, кө­ріп қайттық. Өздері шақырып, қар­жыландырды, – деді жоба авторы.

Амандық «Жартоғай глем­пингі» жобасын сәуір, мамыр айла­рында бастаған. Одан кейін үйін кепілге қойып, бес жарым млн теңге шамасында несие алды. Мұның сыртында, бір жарым млн теңгедей өз қаражатын жұмсап, оған киіз үйдің ішкі бұйымдары, қазан-ошақ, көрпе-жастық деген сияқты тұрмыстық дүниелерді сатып алды.

– Өкінішке қарай, киіз үй­лер­ді арнайы жасаттырып Қыр­ғызстаннан алдыртуға тура келді. Өйткені Қазақстанда жасалған киіз үйлерді сатып алуға шамамыз келіңкіремеді, сосын бізде саудаласу деген кішкене қиындау мәселе екен. Жалпы, негізгі идея жоғарыда айтқандай біздің өңі­рімізде экономиканың баламалы көзін ұсыну ғой. Негізгі мақсат – осы. Бұл – әлеуметтік жоба, өйт­кені осы арқылы туристерді тарту керек. Мәселен, осы өңірдегі жер­гілікті кәсіпорындар мен жеке шаруа қожалықтары өнімдерін сату үшін мың шақырым жерге апарады. Ал турист келсе, сол жерде-ақ, бағасына қарамай сатып алады. Одан кейінгі мақсат, мысалы, біздің Торғай өңірінде қонақүй бизнесі кенжелеп қалған. Өңірге туристерді тарту кезінде көптеген қиындыққа тап келеміз. Кейде қайда жатқызарымызды білмей қаламыз. Қонақүй болмай қалған жағдайда, адамның қабағына қарауға тура келеді. «Жартоғай глемпингі» де осы қажеттіліктен туындаған бастама. Біз негізгі қоныс ретінде осы жерге тоқтаймыз да, туристерді ары қарай басқа өңірлерге алып барамыз. Торғайда туристерді қызықтыратын жер көп қой, Қаратұз, Торғай геоглифтары, Торғайдағы алты музейге, Алтын дала резерватына апаруға болады. Торғайдың жануарлар дүниесі, табиғаты, тарихы бай ғой, – дейді кәсіпкер.

Амандықтың глемпингі жол­дың бойынан қашықтау жерге орналасқан.

– Өйткені бізге жолдан оқ­шаулау, интернеті болмайтын, адам отбасымен келіп табиғат аясында демалатындай болу керек. Демалушыларға біз мынадай қызмет түрлерін ұсынамыз. Қа­зір 4 киіз үй қойдық. Қонақ­үйлер күн батареялары арқы­лы жарықтандырылады. Біріншісі асхана, шаруашылыққа, тамақ да­йындауға арналған. Екіншісі ер­лерге, үшіншісі әйел адамдарға, төр­тіншісі жеке отбасыларға ар­нал­ған. Оларға атқа міну, садақ ату, балық аулау, көремін десе киік­терді көрсету, қажет болса, жаны­мыздағы «Алтын дала» резер­ватының қорғауындағы жа­­нуарлар мен құстар әлемін көр­­сету, сол өңірдегі тарихи орын­дармен таныстыру сияқты қыз­мет түрлері көрсетіледі. Тап­сы­рыс бойынша қой сой десе, қой со­йып береміз, құрт, ірім­шік, қай­мақ, сары май, қымыз, қы­­мыран әкел десе, оны әкеп бере­міз. Биылғы мақсат – бұл жо­баға қызығушылық бола ма, соны байқау. Енді менің ойымша, осы өңірден кеткен азаматтардың көбі туған жерді сағынып келеді деп ойлаймын, мұның сыртында қазір пандемиядан зәрезап бол­ған отбасылар бір оңаша, оқшау жерге барып, тамылжыған тұмса табиғаттың аясында біраз уақыт сергіп, демалып қайтқысы келеді. Ең бастысы, осы қызметті жоғары деңгейде жасап, оларға ұсыну керек. Торғайды көргісі келетін туристер табылады деп ойлаймын, – деді Амандық.

«Жартоғай глемпингі» Торғай өзенінің бойына орналасқан. Мұн­да қазірдің өзінде бірнеше отбасы демалып жатыр.

Қостанай облысы