Тұңғыш Президентіміз тәуелсіздік алған күннен бастап, үнемі халықтың намысын қайрап, жігерін жанып, әрқашанда өркениетке ұмтылған ұзақ мерзімді мақсаттар мен міндеттер қойып келеді. Соның нәтижесінде еліміз кейбір дамыған мемлекеттердің өздерін сүріндірген ауыр кезеңдерден қиналмай өтіп, баршаны таңғалдырған айтулы табыстарға қол жеткізді. Дамудың қазақстандық үлгісін қалыптастыра отырып, беделі биік, абыройы жоғары, қуатты мемлекетке айналды.
Тұңғыш Президентіміз тәуелсіздік алған күннен бастап, үнемі халықтың намысын қайрап, жігерін жанып, әрқашанда өркениетке ұмтылған ұзақ мерзімді мақсаттар мен міндеттер қойып келеді. Соның нәтижесінде еліміз кейбір дамыған мемлекеттердің өздерін сүріндірген ауыр кезеңдерден қиналмай өтіп, баршаны таңғалдырған айтулы табыстарға қол жеткізді. Дамудың қазақстандық үлгісін қалыптастыра отырып, беделі биік, абыройы жоғары, қуатты мемлекетке айналды.
Әрине, бүгінгідей ғарыштық жылдамдықпен алға басқан уақытта бір сәтке де кідіріп қалуға болмайды. Сол үшін Елбасымыз «Қазақстан-2050» Стратегиясын жүзеге асырудың жолдары мен тактикасын нақты белгіленген тың идеяларын жария етіп отыр. Бұл – елдің алыс болашағын болжай білетін, өз халқына шынайы қамқорлық, жанашырлық жасай алатын кемеңгер саясаткердің, дара тұлғаның ғана қолынан келетін тарихи іс. Елбасы өз Жолдауында: «Басты мақсат – Қазақстанның ең дамыған 30 мемлекеттің қатарына қосылуы. Ол – «Мәңгілік Қазақстан» жобасы, ел тарихындағы біз аяқ басатын жаңа дәуірдің кемел келбеті», деп атап көрсетті. Елбасы өз Жолдауында Қазақстанның әлемдегі ең дамыған 30 елдің қатарына кіру тұжырымдамасындағы жеті басым бағытты саралап берді. Және дамудың бұл жолын екі кезеңге бөле отырып, Үкімет пен Ұлттық Банкке биылғы жылы атқаруға тиісті тағы да жеті нақты тапсырма берді. Сондықтан, тәуелсіз Қазақстанның тарихында тағы бір жаңа кезең басталды деуге болады.
Мемлекетіміздің ішкі және сыртқы саясатын нақты айқындап, әлеуметтік-экономикалық дамуымызды терең де жан-жақты қамтыған бұл Жолдау – еліміздің алдағы даму перспективаларын кезең-кезеңмен белгілеп, өткен жылдың соңында «Нұр Отан» партиясының ХV съезінде қабылданған Доктринамен тығыз үндесіп жатқан жаңа саяси бағдарлама. Елбасының Жолдауындағы: «Қазақстан-2050» Стратегиясының түп қазығы – Мәңгілік Ел. Мәңгілік Ел – ата-бабаларымыздың сан мың жылдардан бергі асыл арманы. Ол арман – тұрмысы бақуатты, түтіні түзу ұшқан, ұрпағы ертеңіне сеніммен қарайтын бақытты Ел болу еді», деп атап өтуі елдің тұрмысын жақсартуға, әлеуметтік салаларды дамытуға бағытталған партияның Доктринасымен тікелей сабақтасып жатыр. Осыны ескере отырып, Елбасы: «Жолдаудың мақсаттары мен міндеттерін жүзеге асыру жөніндегі нақты шаралардан әрбір қазақстандық хабардар болуы қажет. Бұл «Нұр Отан» партиясы қызметінің негізгі мәселелерінің біріне айналды деп сенемін», деп атап көрсетті. Демек, бұл әрбір нұротандыққа жүктелген зор жауапкершілік. Оған алматылықтар белсенді атсалысатын болады. Нұротандықтар қазірдің өзінде жаңа Жолдауды ерекше ықыласпен қабылдап, бірауыздан қолдау білдіруде.
Осыған дейін «Ең басты стратегия – халықтың әл-ауқатын арттыру» деген айқын формуламен ілгерілеп келе жатқан жас мемлекетіміздің саяси реформалары экономикалық даму бағдарламаларымен тығыз ұштасып отырғанын өзге жұрттар да көріп, біліп отыр. Сол себепті, қазақстандық даму жолына халықаралық дәрежедегі қоғамдастық лайықты бағасын беріп, әлемдік бағдарламаларға жетекшілік жасау орайында елімізге үлкен сенім көрсетті. Соның айқын бір көрінісі – алдағы уақытта өтетін ЭКСПО-2017 көрмесі.
Әлемдегі 50 дамыған мемлекет қатарына қосылған елімізде байыпты өсу бар, халықтың әлеуметтік тұрмысында тұрақты ілгерілеу бар. Оны алысқа бармай-ақ, алматылықтардың бүгінгі тұрмысының өскенінен де байқауға болады. Қала әкімі, партиямыздың қалалық филиалының төрағасы Ахметжан Есімовтің қолдауымен партия өкілдері тұрақты түрде Индустрияландыру картасына қатысушы өндiрiстiк нысандарды аралап, ондағы жұмыс барысын үнемі назарда ұстап отырады. Мысалы, жыл қорытындысында жүргізілген мониторинг бойынша Индустрияландыру картасына енген 29 жоба аясында: қала метрополитені, радиобайланыс құралдар зауыты, дәрі-дәрмек шығару сияқты, т.б. нысандарда жаңа жұмыс орындары көптеп ашылып жатқанын мақтанышпен атап өтуге болады. Бұл күнде шағын және орта бизнес саласында қызмет жасайтын қалалықтардың саны 370 мыңнан асты. Алматыдағы жан басына шаққандағы ішкі жалпы өнім еуропалық дамыған мемлекеттердің көрсеткішіне тең болып отыр. Тұрақты еңбек пен табыстың нәтижесінде орташа жалақы республика бойынша алдыңғы орынға шықты. Әрбір үшінші алматылық автокөлік мініп жүр. Нәрестелердің дүниеге келуі соңғы үш жылда екі есеге көбейді. Ел тұрмысының өсуі дегеніміз осы болар.
Сондай-ақ, қаланың өз келбеті де ажарланып, инфрақұрылымы жетіліп, мәдениеті өркендеу жолына түсті. Еліміздегі білім мен ілімінің рухани көш басшысы саналатын шаһарымызда театр, спорт сарайы, мектеп, балабақшалар ашылып, басқа да әлеуметтік нысандардың құрылыстары қызу жүріп жатыр. Мысалы, Халықаралық шаңғы кешені көпшіліктің жиі бас қосатын спорт-демалыс орнына айналды. Алдағы уақытта студент жастардың қысқы Универсиадасы өтпек. Оған дайындық жұмыстары жан-жақты жүргізілуде. Міне, осы жетістіктердің барлығын біз халқымыздың игілігі ретінде қастерлеп, дамыта білуіміз керек. Мұның бәрін Елбасы жинақтап: «Бұл құндылықтар – уақыт сынынан өткен қазақстандық жол тәжірибесі», деп айқындады. Және оны тағы да жеті салаға бөліп, «Жаңа қазақстандық патриотизмнің идеялық негізі осы мемлекет құраушы, жалпыұлттық құндылықтарда жатыр», деп атап көрсетті. Бұл жерде қазақ үшін киелі болып табылатын 7 санының да қайталанып келуі тегін болмаса керек. Оны біз Мәңгілік Елдің сәтті жеті қадамы деп түсінсек те болғандай. Соның бәрінде нұротандықтардың қосқан қомақты үлесі бар.
Бүгінде 70 мыңнан астам мүшесі бар Алматы қалалық филиалы республикамыздағы ең үлкен саяси ұйымның біріне айналып отыр. Жоғарыда айтқанымдай, олар барлық әлеуметтік-экономикалық, рухани саладағы дамуға барынша атсалысып, өздерінің күш-жігерін алғаусыз арнауда. Бұл ұйымшылдық өз жемісін беруде. Оның бір ғана айқын мысалы – Алматы қалалық партия ұйымы «Нұр Отан» партиясының сайлауалды тұғырнамасында белгіленген «Ұлттық іс-қимыл жоспарын» жыл сайын асыра орындап келеді. Жаңаша жұмыс кезеңіне шыққан партиямыздағы үлкен өзгерістер мен жаңаруларды қалың жұртшылық көріп отыр. Партия белгілеген міндеттерге орай, қалалық филиалдың ұйымдастыру қызметі одан әрі жаңартылып, бастауыш партия ұйымдарының рөлін арттыру жолындағы нақты шаралар жүзеге асырылуда. Елбасымыз бастаған, туған елі қостаған жаңғыртулар мен өзгерістер партиямызға да оң ықпалын тигізді. Кемел келешекке кең жол ашатын осынау тарихи Жолдау еліміздегі жарқын істерді жаңа белестерге жетелейтініне күмән жоқ.
Кенжехан МАТЫЖАНОВ,
«Нұр Отан» партиясы Алматы қалалық
филиалы төрағасының бірінші орынбасары,
Қазақстанның еңбек сіңірген қайраткері.