Алматы қаласындағы Ұлттық кітапханада Қуғын-сүргінге ұшырағандар жөніндегі Мемлекеттік және өңірлік комиссия жұмыс топтарының басын қосқан семинар өтті. Zoom қосымшасы арқылы онлайн форматта ұйымдастырылған кездесуде Алматы, Шымкент қалалары, Алматы, Жамбыл, Қызылорда және Түркістан обыстары бойынша жұмыс топтарының жетекшілері баяндама жасап, белгілі ғалымдар сөз сөйледі.
Басқосу барысында қуғын-сүргінге ұшыраған, сот органдары ақтаған тұлғаларға қатысты мұрағаттық қылмыстық істерді жинақтау, ақтауға жатпайтын азаматтарға қатысты деректерді тексеру, басқа өңірлерге жер аударылғандар жөнінде мәліметтермен алмасу секілді маңызды мәселелер талқыланды. Атап айтқанда, жұмыс тобының жетекшілері жиын барысында 372 көтерілісті басу барысында сотсыз және тергеусіз атылып кеткен, сондай-ақ осы көтерілістерге қатысқаны және қолдағаны үшін қуғын-сүргінге ұшыраған саяси қуғын-сүргін құрбандары туралы ақпараттарды анықтау кезінде туындап отырған кедергілер жайлы мәлімдеп, материалдар жинау кезінде жұмыс тәжірибесімен алмасудың маңыздылығы жөнінде ой-пікірлерін ортаға салды.
Семинарда Саяси қуғын-сүргін құрбандарын толық ақтау жөніндегі мемлекеттік комиссияның мүшесі Сабыр Қасымов, Алматы қаласы әкімінің орынбасары, саяси қуғын-сүргін құрбандарын ақтау жөніндегі қалалық комиссияның төрағасы Ержан Бабақұмаров арнайы құрылған комиссияның осы уақытқа дейін атқарған жұмыстарына егжей-тегжейлі тоқталса, мемлекеттік комиссия жұмыс тобының жетекшісі, тарих ғылымдарының докторы, ҰҒА құрметті академигі Талас Омарбеков жұмыс тобы құрамына енген ғалымдардың құпия құжаттармен жұмыс жүргізу кезінде анықтаған тың деректеріне тоқтала келіп, 1929-1931 жылдары Қазақстанда 372 рет шаруалардың бұқаралық бас көтерулері болғаны жөнінде тарихи мәліметтерді қайта жаңғыртты.
Алматы қалалық комиссиясы жұмыс тобының жетекшісі Шолпан Забих осы күнге дейін ақталмаған бірқатар көтеріліске қатысушылардың анықталғанын айтса, Түркістан облысы бойынша жұмыс тобының жетекшісі, тарих ғылымдарының докторы Хазретәлі Тұрсын Кеңес өкіметінің ауылшаруашылық реформалары кезіндегі саяси қуғындау саясатының салдарларына тоқталды. Ал 1928-1933 жылдардағы Жетісу өңіріндегі шаруа көтерілістерінің себеп-салдары мен ерекшеліктеріне сараптама жасаған Алматы облыстық комиссиясы жұмыс тобының жетекшісі Еркін Стамшалов бұл аймақтағы шаруалар көтерілістері ауқымы жағынан үлкен әрі әлеуметтік тұрғыдан күрделі екенін атап өтті.
Үш сағатқа созылған семинар жұмысының соңында қатысушылар мәліметтермен алмасу, бірлесіп жұмыс істеу және алдағы атқарылатын жұмыста әріптестік қолдау көрсету, техникалық жарақтандыруды жетілдіруге қатысты ойларын ортаға салып, нақты ұсыныстарын білдірді.