Литвада өтіп жатқан әлем чемпионатының жартылай финалында Қазақстанның футзалшылары бүгін Португалия құрамасымен күш сынасады. Ширек финалда дүние жүзінің екі және қарт құрлықтың жеті дүркін чемпионы деген дардай атағы бар Испанияны жолынан ығыстырған айтулы команда жайында не білеміз?
Португалияның өрендері әлем чемпионатында бес рет бақ сынады. 2000 жылы олар қола медальді иеленді. Гватемалада өткен сол жарыстың топтық турнирінде Пиреней түбегінің түлектері Қазақстан құрамасымен кездесіп, 6:2 есебімен жеңіске жеткені жанкүйерлердің жадында. Дәл сондай есеппен олар алаң иелерін де ұтты. Бірақ Бразилияға әлі жетпеді – 0:4. Өз тобында екінші орынды иеленген португалиялықтар екінші кезеңде Нидерланд (3:1) пен Хорватияны (3:1) жеңгенімен, Испанияға (1:3) есе жіберді. Жартылай финалда қайта бразилиялықтармен жолықты. Бұл жолы Оңтүстік Американың оғландары қарсыластар қақпасына жауапсыз сегіз гол салды. Үшінші орын үшін тартыста Ресейді 4:2 есебімен ұтып, қола медальді олжалады.
2004 жылы Тайпейде Португалия ойыншылары екінші кезеңде сүрінсе, 2008 жылы Бразилияда өз тобынан шыға алмады. 2012 жылы Таиландта плей-оффқа жолдама алды. 1/8 финалда Парагвайды (4:1) жеңіп, ¼ финалда Италияға (3:4) жол берді. 2016 жылы Колумбияда жалауы желбіреген жарыста португалиялықтардың жеңіс тұғырына көтерілуге жақсы мүмкіндігі болды. Топтық турнирден іркілмей өткен олар плей-оффтың алғашқы екі кездесуінде Коста-Рика (4:0) мен Әзербайжанды (3:2) қапы қалдырды. Жартылай финалда Аргентинадан (2:5) айласын асыра алмады. Ал қола медаль үшін тарыста Иранмен тең түсті. Пенальти соғу барысында Парсы елі өкілдерінің (3:4) бағы жанды.
Пиреней түбегінен келген жігіттер Еуропа чемпионатына тоғыз рет қатысты. Алғашқы үш жарыста жолдары болмағанымен, одан кейін жақсы нәтиже көрсете бастады. «Еуро» додасындағы ең зор табысы – 2018 жылғы чемпиондық атақ. Словенияда өткен турнирдің финалында олар Испанияны (3:2) сан соқтырды. 2010 жылы Мажарстанда өткен жарыста ақтық сынға дейін алқынбай жеткенімен, шешуші тұста жоғарыда аталған сыралғы қарсыласының асығы алшысынан түсті – 4:2. 2014 жылғы жарысты төртінші орынмен қорытындыласа, 2012 және 2016 жылдары ширек финалдан аса алмады.
Португалия құрамасының басты жұлдызы Рикарду Филипе да Силва Брага (Рикардиньо) екені сөзсіз. 35 жастағы ойыншының спорттың бұл түрінде бағындырмаған белесі жоқ. Оның ұлттық құрама сапында жүргеніне бақандай 18 жыл болды. Бір кереметі, ол алты мәрте (2010, 2014, 2015, 2016, 2017, 2018) төрткүл дүниенің теңдессіз футзалшысы атанып, бір рет (2016) сұрмергендер көшін бастады. Еуропаның ең үздік ойыншысы (2007, 2018) және ең мерген шабуылшысы (2016, 2018) атағын екі реттен иеленді. Жер- жаһандағы бірде-бір футзалшы осындай орасан зор табысымен мақтана алмайды.
Бұл күндері Балтық жағалауында өтіп жатқан әлем чемпионатының топтық турнирінде португалиялықтар бірінші орынды иеленді. Олар Таиланд (4:1) пен Соломон аралдарынан (7:0) басым түсіп, Мароккомен (3:3) тең ойнады. 1/8 финалда қосымша уақытта Сербияны (4:3) сан соқтырып кетті. Испанияға қарсы өткізген ширек финалдық сайыста да ойын экстра-таймға ұласып, ақырында жеңіске жетті – 4:2.
Міне, жартылай финалда Қазақстан құрамасы осындай азулы қарсыласпен күш сынасады. Бірақ біздің жігіттер де осал емес. Дәл қазір олар «Жеңіске жетеміз!» деп жер тарпып тұр. Егер осы бәсекеде мерейіміз үстем болса, онда Литвадағы дүбірлі доп додасында бас жүлде үшін таласу мүмкіндігіне ие боламыз. Олай болса, тартынатын несі бар?! Алға, Қазақстан!
Тағы бір айта кетерлік жайт, екі команда бір-бірімен небәрі екі рет қана кездесті. Ғасырлар тоғысында Гватемалада болған жайтты жоғарыда айттық. Есесіне 2015 жылы Еуропа чемпионатының іріктеу ойынын өткізу үшін Қазақстанға келіп, біздің жігіттерден 1:3 есебімен жеңіліп қайтты.