Облыс орталығында ел Тәуелсіздігінің 30 жылдығына арналған «Менің Отаным – менің Қазақстаным» атты сәндік-қолданбалы өнер шеберлерінің облыстық көрме-байқауы өткізілді.
Халықтың сәндік-қолданбалы өнері – әлемдік көркем мәдениеттің негізі, даналық пен әсемдіктің таусылмас қайнар көзі. Сан ғасырдан бері жалғасып келе жатқан қолөнер ұлттық ою-өрнек пен қоршаған әлемнің сан қилы бедерін бейнелеп, тылсым тарих қойнауынан сыр шертеді. Түрлі-түсті реңге боянған әсемдік пен көркем шеберліктің әдемі үлгілері ұсынылған көрме көпшілік назарын өзіне аударды. Асылында, ұлттық салт-дәстүр мен әдет-ғұрыпты еске салуымен құнды. Облыс аудандарынан келген қолөнер шеберлері көз майын тауысып жасаған тамаша туындыларымен таныстырды. Қайта жаңғырған көненің көзі Алаш жұртының ықылым заманнан бері өнерді серік еткендігін аңғартады.
– Көрмеге 11 аудан мен үш қаланың қолөнер шеберлері қатысуда, – деді облыстық «Қоғамдық келісім» мекемесінің басшысы Ермек Нұғыманов. – Биыл Ассамблея жұмысына біршама өзгерістер енгізіп, барлық аудандарды қамтып жұмыс істедік. Осындай шаралар барлық аудандарда өткізілді. Халықтың төл өнерін кеңінен насихаттауға атсалыстық. Ең қуаныштысы, өнер үзілмеген екен.
Қосшы қаласынан келген шеберліктің шыңына шыққан Нұржан Ділманов ұлттық аспаптардың 52 түрін жасайды екен. Күй әуенімен орғи секірген ортекесі талғампаз қауымның көңілінен шықты.
– Домбырадан бастап, қазақтың барлық ұлттық аспаптарының түр-түрін жасаймын. Шаңқобыз, жетіген, қобыз, бас домбыра, сазсырнай, сылдырмақ, асатаяқ секілді аспаптарды бүгінде мектеп оқушылары музыка сабағына, өнер колледждерінің студенттері жеке өздеріне көптеп тапсырыс беруде. Бүгінде үш шәкірт тәрбиелеп шығардым, олар да өз шеберханаларын ашып, ұлттық аспап түрлерін тапсырыспен жасайтын дәрежеге жетті, – дейді шебер.
Халқымыздың мәдениеті мен дәстүрін нығайтуға бағытталған бірқатар жаңа жобалар іске асырылуда. Ел Тәуелсіздігінің 30 жылдығы аясында облыста «30 игі іс», «Мың бала», «Қазақтану» ғылыми-ағартушылық және «Бір шаңырақ астында – бір мақсатқа» жобалары қолға алынған. Бүгінгі шара соның бір дәлелі.
Қазылардың шешімімен бірінші орынды Қосшы қаласынан келген ағаш және тері шебері Асхат Бозымбай иеленсе, бас жүлдеге шортандылық суретші-қолөнерші Бектас Кәрім лайық деп танылды. Көрме соңы ән-жырға ұласты. Көрмеден құрқол қайтқандар жоқ. Талапкерлердің барлығына сый-сияпат табыс етілді. Ең басты олжа – ұлттық мұраның ұлықталып, қайта жаңғыруы болды.