Таяуда Қазақстанның Тұңғыш Президенті – Елбасы кітапханасында суретші Динара Қадырованың «Ұмай бесік жыры» атты жеке көрмесі ашылды.
Оған қылқалам шеберінің сегіз жылдан бері жинаған 27 үздік жұмысы қойылды. Жалпы, автор шығармашылығында түркі мәдениеті мен ұлттық дәстүр және әйел әлемі айрықша орын алады. Сондықтан суретші көрме тақырыбын ұрпақ жалғастығын жебейтін періштеге арнап, «Ұмай бесік жыры» деп атапты.
Мәдени шараның ашылуында Елбасы кітапханасының директоры Бақытжан Темірболат көрме иесінің шығармашылығы графика, кескіндеме, иллюстрация, сандық өнер секілді түрлі жанрды қамтитындығын айта келіп: «Суретші әлемінің қайнар көзі – ана тақырыбы. Сол себепті де оның суреттерінде балалар, әйелдер, табиғат бейнелері басым. Осы көрмедегі картиналардан Ұмай жебеушісінің шуағын сезінуге болады», десе, белгілі суретші, дизайнер, иллюстратор, «Қазақстанның 100 жаңа есімі» жобасының жеңімпазы Әйгерім Кәрібаева: «Динарамен 2005 жылдан бері таныспын. Ол – әлемге ерекше көзбен қарайтын суретші. Бұл суреттерді ол үйінде салды, сол жерден көрмеге әкелді. Сондықтан оларды шаңырақ шуағына шомылған дүниелер деп айтуға болады. Оның еңбектерінен адами құндылықтарды көресіз», деп әріптесінің өнерін жоғары бағалады.
Динара Қадырова −Алматы қаласында өмірге келіп, Т.Жүргенов атындағы Қазақ ұлттық өнер академиясында білім алған. Оның бірқатар жұмысы ЮНЕСКО-ның жинақтарында жарияланған. Дарынды студент ретінде Қазақстанның Тұңғыш Президенті – Елбасы Нұрсұлтан Назарбаевпен жүздескен. 2012 жылы жас суретші орындаған қалалық кафенің дизайн жобасы Time out сыйлығының «Жыл жаңалығы» аталымын иеленген. Сонымен бірге оның Ұлы Жібек жолы қалаларына арналған графикалық жұмыстарының дипломдық сериясы Тұңғыш Президент күніне арналған «Астана-2013 Дизайн апталығы» фестивалінде қойылған.