АҚШ жағалау күзеті Оңтүстік Калифорния жағалауына төгілген мұнайдың жалпы мөлшерін бағалауға кірісті. Сондай-ақ бұған не себеп болғанын зерттеу де жалғаса бермек.
Лос-Анджелестегі Лонг-Бич аймағының сектор командирі, капитан Ребекка Оренің хабарлауынша, алдын ала есептеу бойынша құбырдан кем дегенде 588 баррель мұнай төгілген болуы мүмкін.
«Біз мәселені нақты анықтаумен айналысып жатырмыз. Бұл көлем әлі де өзгеруі мүмкін», деді капитан Оре.
Мұнайдың төгілуіне байланысты жұмыс жүргізетін ұйымдар тобының мәліметіне сүйенсек, өткен жұмада 132 баррель шикі мұнай жиналған. Бұған қосымша жағалаудан қосымша 78 тонна «майлы қоқыс» табылған.