А.Байтұрсынов атындағы Қостанай мемлекеттік университетінің ғалымдары мен магистранттары жақында жұртшылыққа жел генераторынан, фотоэлектрлі күн батереясынан және күн коллекторынан тұратын баламалы қуат көздері кешенін көрсетті. Қостанай өңіріндегі жоғары оқу орындарының арасында бұл кешен бірегейлігімен ерекшеленіп отыр. Өйткені, желден, күн сәулесінен электр энергиясын өндіретін бұл кешен студенттер мен магистранттарға сабақ үшін құрылған макет емес, ол қазірдің өзінде электр энергиясын өндіріп тұр.
Қазір қалдықтардан шаршаған, Жер-Ананың қойнындағы бар құтты тауысуға айналған әлем «жасыл экономикаға» бет бұра бастады. Оның негізі энергияны баламалы қуат көздерінен өндіру болып табылады. Қостанай мемлекеттік университетінің ғалымдарымен, оқытушылары осы бағытта жұмыс істеуге белсеніп отыр. Ғылыми зертханада баламалы қуат көздері үшін қажетті жабдықтар алынған. Жел, күн қондырғыларынан өндірілген электр энергиясымен университеттің № 3 корпусын қамтамасыз етеді.
Оқу корпусының шатырына орналастырылған күн коллекторына жалғанған екі құбыр ғимараттың ішіне жіберіліп, ол корпустағы буфетке жеткізілген. Осы құбырдың арқасында ондағы су жылып тұр. Асханадағы ыдыс жууға пайдаланатын су тегін жылытылуда. Ал оқу корпусының артына орнатылған жел генераторы өндірген 5 квт электр энергиясы білім ордасы ғимаратының алдындағы гүлзарды түнде жарықпен қамтамасыз етеді. TEMPUS халықаралық жобасы шеңберінде жасалған бұл кешен Электр энергетикасы және физика кафедрасының оқытушылары мен магистранттарының зерттеу еңбегі. Кафедра меңгерушісі Игорь Кошкиннің айтуынша, 13 магистрант жаңғыртылған қуат көздерін пайдалану арқылы даму және экологиялық инжиниринг тақырыбын одан әрі зерттеуде. Олардың үздіктері өз жобаларын Астанада өтетін болашақтың энергиясына арналған ЭКСПО-2017 әлемдік көрмесіне қоюды да армандайды.
Нәзира ЖӘРІМБЕТОВА,
«Егемен Қазақстан».
ҚОСТАНАЙ.