Павлодардағы «Ертіс Медиа» ғимаратының қабырғасына облыстық «Кеңес туы» (қазіргі Saryarqa samaly) газетінің тұңғыш редакторы, елімізде түркітану мектебінің негізін қалаушы Бейсембай Кенжебайұлына арналған мемориалдық тақта қойылды.
Бұл күнгі рухани рәсімге Алматы, Нұр-Сұлтан қалаларынан ғалымның ұрпақтары Қайрат Қадырбеков, Жанар Жұмабаева, Әділ Бектұровтар арнайы келіп қатысты.
Тағзым тақтаның ашылу салтанатына жиналған зиялы қауым өкілдері Бейсембай Кенжебайұлының есімі бұл өңірде айрықша құрметтелетінін, өйткені 25 жасында Павлодар округінің «Кеңес туы» газетінің тұңғыш редакторы ретінде бекітіліп, 1929 жылы 15 ақпанда басылымның алғашқы нөміріне қол қойғанын атап өтті.
Өнегелі жанның өмірбаянына көз салсақ, Оңтүстік Қазақстан облысы, Ордабасы ауданы, Бөген ауылында туған. Студент кезімізде Алматыда оқығанда ғалым атамыздың лекцияларын біздер де тыңдаған едік.
Ғалым қазақ әдебиетінің, ұлт баспасөзінің тарихына арналған көптеген ғылыми жазбалардың, Абай, Сұлтанмахмұт, Жамбыл, Мұхамеджан Сералин, Мұхтар Әуезовтердің өмірі мен шығармалары туралы зерттеулердің авторы екені белгілі.
Кеңестік кезеңде қазақ әдебиетінің тарихы Бұхар жыраудан басталады деген пікірді теріске шығарып, оның Орхон-Енисей жазбаларынан тамыр тартатынын ғылыми тұрғыдан дәлелдеген. Көркем проза және аударма саласында да көп еңбек етті.
Ал ұрпағы Қайрат Қадырбеков атасының еліміздің әдебиет ғылымында өз мектебін қалыптастырғанын айтты. «Бейсенбай атамыз ҚазМУ-да қызмет атқарып, студенттерге лекцияларын оқып жүрген кезде 42 ғылым кандидатын, 3 ғылым докторын дайындапты. Олар – Мұхтар Мағауин, Мырзатай Жолдасбеков, Алма Қыраубаева сияқты елге танымал тұлғалар. Ол кісінің өз ұстаздары да мықты, кезінде Міржақып, Бейімбеттердің жанында жүрді. Ұлттық рухты ұрпағына жеткізуде аянбай тер төкті. Ғұмырын ұлт әдебиетіне, ұлттық жаңғыруға арнаған тұлғаға құрмет көрсеткен сіздерге Бейсенбай Кенжебаевтың оңтүстіктегі ұрпақтарының сәлемін жеткізіп отырмын. Сіздерге алғыс білдіреміз», деді ол ағынан жарылып.
Газеттің алғашқы нөмірінің жарық көруіне, содан кейінгі жылдары округтік партия комитетінің бюро мүшесі болған Әмірғали Епмағанбетов, округтік партия комитеті үгіт-насихат бөлімінің меңгерушісі Кәрім Әжібековтер зор көмек көрсеткен. Кейіннен бұл азаматтар газет жұмысына белсене араласып, жылдар бойы редакция алқасының тұрақты мүшесі болады.
«Сонымен «Кеңес туының» бірінші нөмірін Әмірғали, Кәрім үшеуіміз қол қойып шығарған едік», деп Бейсембай Кенжебаевтың өзі естелік жазған.
Облыстық Saryarka samaly газеттің редакторы Нұрбол Жайықбаевтың айтуынша, бүгінде редакция қорында Б.Кенжебайұлының сол кездегі қызметіне қатысты облыстық мемлекеттік архивтен табылған бірнеше жеке деректерінің көшірмесі сақталған.
Салтанатты шара соңында Nur Otan партиясы облыстық филиалы төрағасының бірінші орынбасары Илья Теренченко, Парламент Сенатының депутаты Алтынбек Нухұлы және жергілікті зиялы қауым өкілдері мен журналистер тағзым тақтасына гүл шоқтарын қойды.
ПАВЛОДАР