Елордада Kazakhstan Security Systems қауіпсіздік жөніндегі халықаралық көрме-конференциясы өтті. Көрмеге келушілер нарықтағы жағдай, саладағы үрдістер, оны дамытудың перспективалық бағыттарына қатысты өзекті мәселелерді шешу мақсатында салалық көшбасшылардан, ғылыми-техникалық және сараптамалық қоғамдастықтан, мемлекеттік билік органдарынан толық ақпарат алды.
Kazakhstan Security Systems – қауіпсіздік саласындағы заманауи әзірлемелерді, технологияларды ұсынатын, қауіпсіздік құралдарының мамандары мен тұтынушыларының, қоғамдастық пен мемлекеттік билік өкілдерінің кең аудиториясын біріктіретін іскерлік алаңы.
Іс-шара барысында Терроризмге қарсы орталық штабтың бөлім басшысы Жанарбек Жаңабаев 2018-2020 жылдары ел көлемінде терроризмді қаржыландыруға қатысты 26 факті тіркеліп, жолы кесілгенін мәлімдеді. «Біз Қаржылық мониторинг агенттігімен террористік әрекеттерді қаржыландыруға қарсы күресті бірлесіп жүргізіп жатырмыз. Елімізде діни деструктивті ағымдарды қаржыландыру мәселесі басты назарда. ҰҚК, ІІМ, Бас прокуратура, Қаржылық мониторинг агенттігі және Қаржы министрлігі Кірістер комитетінің бұл жөнсіздікке қарсы бірлесіп күресу механизмі әзірленді. Статистикаға сүйенсек, 2018-2020 жылдары ел көлемінде терроризмді қаржыландыруға қатысты 26 факті тіркеліп, жолы кесілді. Аталған фактілер бойынша қылмыстық іс қозғалды. Бұл орайда Ақпарат және қоғамдық даму министрлігі де халық арасында түсіндіру жұмыстарын ұйымдастырды. Биылдың өзінде экстремистік қылмысқа барған 3 азаматтың үстінен іс қозғалды», деді Ж.Жаңабаев.
Одан бөлек «Жусан» операциясының нәтижесінде қазақстандық 77 әйел радикалды идеологиядан өз еркімен бас тартқаны айтылды. «Сирияда террористік ұйымдардың құрбаны болып, «Жусан» операциясы барысында құтқарылған бірқатар отандасымыз туралы білесіздер. Аталған операция алдында дайындық жұмыстары жүргізілді. «Жусан» операциясы арқылы барлығы 607 қазақстандық елге оралды. Оның ішінде 37 еркек, 157 әйел және 413 бала (соның ішінде 34 жетім бала) елге аман-сау жеткізілді. 59 адам қылмыстық жауапқа тартылды. Қазақстанға келген соң отандастарымызды бейбіт өмірге бейімдеу шарасы өткізілді. Нәтижесінде, 88 әйел дәстүрлі дінімізді қайта қабылдап, 77 әйел радикалды идеологиядан бас тартты», деді ол.
Алқалы жиын аясында Қазақстан Республикасы Терроризмге қарсы орталығының қолдауымен террористік тұрғыдан осал (ТТО) объектілерді терроризмнен қорғау, сондай-ақ лаңкестік қатерлерге қарсы іс-қимыл шараларын жетілдіру мәселелері бойынша республикалық конференция өткізілді.
Конференция орталық мемлекеттік және жергілікті атқарушы органдардың, Ұлттық қауіпсіздік комитетінің, ғылыми-сараптамалық қоғамдастықтың, бизнес ортаның өкілдерін, сондай-ақ ТТО объектілердің иелерін, басшыларын және өзге де бейінді қызметкерлерін жинады. Мемлекеттік органдардың мамандары мен ұлттық қауіпсіздік саласындағы сарапшылар объектілердің терроризмге қарсы қорғалуының қазақстандық жүйесінің ағымдағы жай-күйі мен даму перспективаларын талқылады. Террористік сипаттағы қазіргі заманғы қауіп-қатерлерге қолданыстағы, әсіресе адамдар көп жиналатын объектілер мен білім беру мекемелеріндегі қауіпсіздік жүйелерінің мәселелері жеке қаралды.
Ішкі істер министрлігінің сарапшысы күзет қызметін лицензиялау бойынша қабылданған заңнамалық бастамаларды дамытуда террористік тұрғыдан осал объектілердің қауіпсіздігін қамтамасыз етуге тартылатын жеке күзет ұйымдарына қойылатын талаптарды жария етті. Терроризмге қарсы орталық штабы тұрғысынан осы жылы Үкімет қаулыларымен бекітілген террористік тұрғыдан осал объектілерге жатқызудың жаңа қағидалары мен өлшемшарттары, сондай-ақ оларды қорғауды ұйымдастыруға қойылатын талаптар түсіндірілді. Осы алаңда терроризмге қарсы іс-шараларды жариялау, оның ішінде терроризмге қарсы операция өткізу кезеңінде мемлекеттік органдар мен БАҚ-тың өзара іс-қимыл деңгейін арттыру үшін журналистерге арналған «Террористік қауіп-қатерлерге ақпараттық ден қоюдағы БАҚ-тың рөлі, сондай-ақ діни экстремизм мен терроризмге қарсы насихат ұйымдастыру» тақырыбында семинар-тренинг ұйымдастырылды.