Энергетика министрлігінің лауазымды тұлғасына қатысты резонанстық газ ісі бойынша үкім шығарылды, ол 115 мыңнан 3 млн теңгеге дейін пара алды. Бұл туралы ҚР Сыбайлас жемқорлыққа қарсы іс-қимыл агенттігінің Нұр-Сұлтан қаласы бойынша департаментінің басшысы Шыңғыс Қабдолла айтты, деп хабарлайды Egemen.kz.
«Осы жылдың қазан айында Энергетика министрлігінің лауазымды тұлғасы Амангелдіұлына қатысты резонанстық, газ ісі бойынша үкім шығарылды, оған әлеуметтік газ көлемін бөлгені үшін Маңғыстау, Павлодар, Батыс Қазақстан облыстарының газ желісі ұйымдарының өкілдерінен 115 мыңнан 3 млн теңгеге дейін жүйелі негізде пара алу фактісі бойынша 8 жыл мерзімге бас бостандығынан айыру жазасы тағайындалды», деп хабарлады Қабдолла брифингте.
Ол қосымша жаза ретінде сот пара сомасын өндіріп алғанын қосты.
Департамент басшысының айтуынша, сот оның сыбайласы - Маңғыстау облысының газ желісі ұйымының директорына үш жыл бас бостандығынан айыру жазасын тағайындады.
Сот үкімі заңды күшіне енді.