Ағымдағы жылдың 6-9 желтоқсаны күндері Түркияның Ыстанбұл қаласында өтуге тиіс бокстан әйелдер арасындағы әлем чемпионаты кейінге шегерілді.
Жер-жаһанда пандемияның қайта өршуіне байланысты күні кеше ғана Халықаралық әуесқой бокс қауымдастығының (АИБА) басшылығы осындай шешім қабылдады. Және де осы ақпаратты олар өздерінің ресми сайтында жариялады. «Кейбір командалардың әлемдік додаға тыңғылықты даярланғанын жақсы білеміз. Осы жағымсыз жаңалықты естіген бетте олардың көңілдері су сепкендей басылатыны анық. Әрине, біз оларды жақсы түсінеміз. Бірақ біздер үшін ең бастысы – спортшылар мен бапкерлердің және осы саланың басы-қасында жүрген азаматтардың денсаулығы мен қауіпсіздігі. Сол себепті де осындай қадамға баруға мәжбүр болып отырмыз», дейді АИБА президенті Умар Кремлев.
Сөйтіп, әлем чемпионаты кейінге шегерілді. Шамасы ол келесі жылы сол Анадолы елінде өтеді. Бірақ аталған жарыстың жалауы нақты қай уақытта желбірейтіні әлі нақтыланған жоқ.