Қазақстанның Төтенше жағдайлар министрі Юрий Ильин «Абай» шахтасында жарылыс болған жердегі жағдай туралы айтты, деп хабарлайды Egemen.kz.
Ол аталған көмір кенішіндегі барлық жұмыстар тоқтатылғанын және қазір ол жерде мемлекеттік комиссия бар екенін атап өтті.
«Шахтадан бір уақытта 8 мың текше метрден астам метан шығарылғаны анықталды. Біз дәл осы кенжарда метан концентрациясының 41%-дан астам күрт өсуін байқадық. 100 тоннаға жуық тау-кен үйіндісі болды. Бүгінгі күні үйінділерді жинау жұмыстары жалғасуда. Менің ойымша, күннің соңына дейін шығару жұмыстары аяқталады», деді Юрий Ильин Сенаттағы Үкімет сағатында.
Министр Үкімет сағатынан кейін апаттың себептерін анықтау үшін Қарағанды облысына аттанатынын хабарлады.
«Бірнеше рет біз «АрселорМиттал Теміртау» объектілеріндегі өнеркәсіптік қауіпсіздіктің қанағаттанғысыз жай-күйіне назар аудардық. Инспекторлар тұрақты негізде тау-кен жұмыстарын жүргізуге, көмір қабаттарын алдын ала газсыздандыруға, кейбір учаскелерде метан концентрациясын автоматты түрде анықтау жүйесінің болмауына байланысты қауіпсіздік талаптарын жүйелі түрде бұзушылықтарды анықтады», деді Ильин.
Оның айтуынша, сот органдарына көмір шахталарының қауіпті учаскелерінде тау-кен жұмыстарын жүргізуді тоқтата тұруға талап арыздар жіберілген. Бірақ сот қауіпті учаскелерді тоқтата тұру туралы шешімді қолдамайды және тек әкімшілік айыппұл салады.
«Санкциялар мен салынатын әкімшілік айыппұлдардың сомасы тексерілетін субъектілерге қатысты шамалы, бұл оларды бұзғаны үшін жауапкершілікті нивелирлеуге әкеп соғады. Іс жүзінде әкімшілік айыппұл төлеу тиімдірек болды», деді ТЖМ басшысы.
Еске сала кетсек, 7 қарашада «АрселорМиттал Теміртау» АҚ «Абай» шахтасында метан лақтырылып, кенеттен жарылыс болды. Апат салдарынан екі адам зардап шегіп, алты шахтер қаза тапты. Іс бойынша тергеу жұмыстары басталды.