Жетісуда құсбегілердің дәстүрлі «Сонар» республикалық турнирі өтті. Биылғы жарыс Ескелді ауданындағы «Тау-Жетісу» демалыс аймағында болды.
Еліміздің түкпір-түкпірінен жиналған саятшылар осымен жиырма төртінші мәрте ұйымдастырылған «Сонарға» жиналды. Осы жолғы жарысқа еліміздің 11 облысынан сұңқар, қаршыға ұшырып, бүркіт баптаған әрі құмай тазы ерткен сексеннен астам саятшы келген екен.
– Қаршыға, бүркіт, тазы иттердің аң аулаудағы әдіс-тәсілі айрықша дамып келеді. Олардың иелеріне ынталандыруға бөлінген қаражат та соңғы үш жылда өте жақсы деңгейге жетті. Мысалы, биыл бірінші орынға бір миллион теңгеге дейін марапат тағайындалған, – дейді облыстық Дене шынықтыру және спорт басқармасының басшысы Нұрбақыт Теңізбаев.
Сонымен, биылғы «Сонар» қызықты да тартысты өтті. 4 күнге
созылған сайыста тазылар 350-500 метрге жүгіріп жарысты. Жүйріктігі желмен бірдей қазақы иттердің ұшқырлығы, ептілігі, сыналды. Осылайша, жотадан естілген қыран құстың қиқуы саятшылардың делебесін қоздырды. Сайыста Алматы облысынан қатысқан құсбегі Әйетбай Ермұханның «Нұра» атты бүркіті түлкіге 23 секундта жетіп, «Бүркіт» номинациясында бірінші орынды иеленді. Сонымен қатар «Қаршыға» номинациясында 1-орынды Сейітжан Бексұлтан иеленді. Ал сұңқарлардың арасында «Қаракөз» атты құс баласы мықтылығын танытып, оның иесі Көдеков Мұрат 1-орыннан көрінді. Және «Құмай тазы» номинациясында «Тұйғын» атты тазы бәрінен озып келіп, бапкері Айдос Оспановтың қанжығасына 1-орынды байлап берді.
Алматы облысы