Қызылордадағы Достық үйінде «Сыр журналистикасының тарихы» 5 томдық жинағының тұсауы кесіліп, оған Парламент Сенатының депутаты Нұртөре Жүсіп, облыс әкімінің орынбасары Серік Ахмет, облыстық мәслихат хатшысы Наурызбай Байқадамов, Қазақстан Журналистер одағының төрағасы Сейтқазы Матаев, Ұлттық ғылым академиясының корреспондент-мүшесі, филология ғылымдарының докторы Амантай Шәріп, «Бас редакторлар клубы» ҚБ президенті Бибігүл Жексенбай, Қазақстан Журналистер одағы Түркістан облыстық филиалының жетекшісі Ғалымжан Елшібай, «Түркістан медиа холдингі» ЖШС басқарушы директоры Тельман Бейсен, «Сыр медиа» ЖШС бас директоры Аманжол Оңғарбаев қатысты.
Аймақтағы зиялы қауым өкілдері бас қосқан жиында облыс әкімінің орынбасары Серік Ахмет жинақтың мән-маңызына тоқталып, аймақтағы БАҚ тарихын түгендеудегі жергілікті «Сыр медиа» ЖШС мамандарының еңбегін айрықша атап өтті.
– Дәстүрлі БАҚ пен бүгінгі медиа дамудың жаңа сатысына көтерілген қазіргідей кезеңде аймақ журналистикасының тарихын түгендеу құптарлық іс. Өңір журналистикасының бұрынғысы мен бүгінгісін бейнелеген бестомдықтың Тәуелсіздігіміздің 30 жылдық мерейтойы қарсаңында оқырманға жол тартуы зор қуаныш, – деді облыс әкімінің орынбасары.
Жинақтың І томында «Сыр бойы», «Кызылординские вести», «Ақмешіт жастары» газеттерінің, «Сыр медиа» ЖШС тарихы топтастырылған. Екінші томда «Ақмешіт апталығы» мен аудандық 7 басылым туралы деректер жинақталса, үшінші кітап аймақтағы электронды БАҚ, баспахана тарихы және республикалық БАҚ тілшілері туралы. Жинақта тәуелсіз басылымдар жөніндегі мәлімет пен Сыр бойынан шыққан белгілі журналистер тәжірибесі, шеберлік дәрістері топтастырылған.
Сенат депутаты Нұртөре Жүсіп газет бетінде әр кезеңнің тыныс-тіршілігі айқын көрініп тұратындықтан кітап ел шежіресі деп атауға лайық деген ой айтты. «Кезінде Кеңес баспасөзінің тарихын жаттап өстік, шетел баспасөзінің өткенінен де хабарымыз бар. Бүгінгі бестомдық осыған дейін ескерусіз қалып келген ұлттық журналистика тарихын түгендеудегі толымды еңбек болып тұр» деді сенатор.
Жиында Қазақстан Журналистер одағының төрағасы Сейтқазы Матаев, белгілі журналист Бибігүл Жексенбай ой-пікірлерін ортаға салды. Ұлттық ғылым академиясының корреспондент-мүшесі Амантай Шәріп Тәуелсіздіктің 30 жылдығына орайластырылған бастама басқа аймақтар мен журналистер даярлайтын белді оқу орындарына үлгі болуы тиістігін атап өтті.
– Қолымызға жаңа тиіп отырған кітапты парақтап шығуға ғана үлгердік. Соның өзінде еңбектің тек естеліктер емес, ғылыми негізді жұмыс болғанына көзіміз жетіп, көңіліміз толып отыр. Ең бастысы, облыстан шығатын басылымдар, электронды БАҚ, қазіргі жаңа медиа қамтылған. Ондағы материалдар мазмұнына сараптама жасалған, – деді ғалым.
«Сыр медиа» ЖШС бас директоры Аманжол Оңғарбаев облыс әкімдігі қолдауымен жарық көріп отырған жинақты дайындауға серіктес мамандарымен бірге әріптестердің барлығы атсалысқанын атап өтті.
– Біз осы уақытқа дейін «Сыр бойы» газетінің алғашқы редакторы Жиенғали Тілепбергенов деп келдік. Ал Ресейдің мемлекеттік кітапханасынан табылған мәліметте бірінші нөмірде редактор ретінде Батырғали Калюковтың аты көрсетілген. Калюков пен Тілепбергеновтің арасында басылымға жетекшілік еткен азаматтар да бар екен. Аудандық архивтердегі көп мәліметтердің жойылып кеткені де біраз қиындық тудырды. Аймақтан шыққан журналистерге арналған том Қалжан Қоңыратбаев, Мұстафа Шоқай секілді ардақтыларымыздан басталып отыр, – деді Аманжол Сақыпұлы.
Іс-шара соңында «Сыр журналистикасының тарихы» 5 томдығының лентасы салтанатты түрде қиылып, қалың оқырманға жол тартты.
ҚЫЗЫЛОРДА