Еліміздің жоғары оқу орындарының 150-ден аса студенті «ҚазТрансОйл» АҚ-на ақы төленетін өндірістік тәжірибеден өтті. Осылайша, жетекші жоғары оқу орындарының үздік студенттері іріктелді.
«ҚазТрансОйл» АҚ Білім және ғылым министрлігінің қолдауымен инженер-техникалық және мұнай-газ мамандықтары бойынша кадрларды даярлау жөніндегі жобаны 2019 жылы іске қосты, бірақ пандемия бастаманы іске асыруда кедергісін келтірді. Биыл компанияның кәсіпорындарында студенттік практика қайта жанданды.
– Бұл – болашақ мамандар даярлауға үлкен үлес. «ҚазТрансОйл» АҚ өндірістік объектілерінде жастарды оқыта отырып, біз мұнай құбыршыларының жаңа буынын әзірлейміз, – деп атап өтті «ҚазТрансОйл» АҚ бас директоры Димаш Досанов.
«ҚазТрансОйл» АҚ адам ресурстарын басқару департаментінің менеджері Әсел Тұқманованың айтуынша, 2020 жылы елімізде енгізілген карантиндік шараларға байланысты «ҚазТрансОйл» АҚ-на ақы төленетін кәсіптік практика тоқтатылып, 2021 жылғы қазаннан бастап қайта басталды. Жыл соңына дейін біздің компанияда 150-ден астам студент практикадан өтеді.
Іріктеу кезінде студенттердің үлгерімі мен белсенділігі ескерілді. Осы жылғы практиканттардың арасында көшбасшылық қасиеттері бар болашағы зор жастар көп.
– Мен Талдықорғанда көп балалы отбасында туып өстім. ҰБТ-да 140-тан 125 балл жинап, «Мұнай-газ ісі» мамандығы бойынша ЖОО-ға түстім. Университетте мен оқу саламмен байланысты іс-шараларға және конкурстарға белсенді қатысамын, сондай-ақ волонтерлік қызметпен айналысамын. Мені «ҚазТрансОйл» АҚ-қа ақы төленетін тағылымдамаға қабылданғаным туралы жаңалық таң қалдырды, өйткені бұл студенттер үшін үлкен мүмкіндік. Операторлық қызметтер департаментіне келіп, Қазақстанның мұнай құбырлары жүйесі, технологиялық процестерді басқарудың автоматтандырылған жүйелері және метрология туралы көп ақпарат алдым. Бұл тағылымдама маған теориялық білімімді іс жүзінде қолдануға көмектесті. Алған білімім және дағдыларым үшін біздің менторларымызға шексіз ризамын және болашақта маған еліміздің жетекші ұлттық компаниясында жұмыс істеу мүмкіндігі пайда болады деп үміттенемін, деді Қазақ-Британ техникалық университетінің 4-курс студенті Еркежан Айтмолда.
Студенттерге мұнай тасымалдау саласының ерекшеліктерін зерттеуге оларға бекітілген кураторлар көмектесті.
– Біз студенттерді мұнай тасымалдаудың технологиялық процесімен таныстырдық, оларға бас диспетчерлік басқарманың жұмысы көрсетілді. Студенттер жұмыс процесіне қатыстырылып, оқуға қызығушылықтарын арттырды. Болашақта бұл жастар біздің компания жұмыскерлерінің қатарын толықтырады деп үміттенеміз, – деді «ҚазТрансОйл» АҚ операторлық қызметтер департаментінің инженері Дәулет Кибатов.
Практика барысында колледжде өзіміз оқып танысқан аспаптармен жұмыс істеуді үйрендік. Бұған бізге басшылар көмектесті, олар еңбек қауіпсіздігі және еңбекті қорғау бойынша кіріспе нұсқама өткізді. Сонымен қатар бізді арнайы киіммен, тегін тамақпен және тасымалдаумен қамтамасыз етті, – деді Toraighyrov university 3-курс студенті Совет Әділ.
Көптеген студент үшін ақы төленетін өндірістік тәжірибе бір айға болашақ мамандық бойынша «жұмыс істеуге» мүмкіндік берді. Осы уақыт ішінде диплом жұмысының тақырыбын таңдағандар да болды.
– Мен Қарашығанақ кен орны орналасқан Батыс Қазақстан облысының Ақсай қаласында дүниеге келдім. Бала кезімнен мұнай-газ секторындағы жұмысты естіп өстім. Бұл мамандық таңдауға әсер етті. «ҚазТрансОйл» АҚ-на практикадан өту кезеңінде дипломдық жұмысымның тақырыбын таңдадым. Мен үшін қазіргі өндірісте өзекті және сұранысқа ие болатын дипломдық жобаны жазу өте маңызды. Сонымен қатар университетте мен стратосферадан көміртекті алу бойынша стартап-жобалармен айналыстым. Мен экологияны сақтап, қоғам үшін пайдалы болғым келеді. Бұл факт практикадан өтуді таңдауға да әсер етті, өйткені мен «ҚазТрансОйл» АҚ өндірістік объектілері көміртекті бейтараптыққа қол жеткізетін елдің ірі кәсіпорындарының бірі екенін білемін, – деді Қазақ-Британ техникалық университетінің 4-курс студенті Карина Қанат.
Ақы төленетін практикадан өту барысында алынған практикалық білім мен дағдылардан басқа, студенттер компаниядағы еңбек қауіпсіздігі мәдениетінің жоғары деңгейін атап өтті.
– Бір ай бойы мұнай тасымалдау департаментінде жұмыс істедім. Бұл департаментті «ҚазТрансОйл» АҚ-ның «жүрегі» деп айтсам қателеспеймін. Біз нақты жобалармен жұмыс істедік, құбыр желілерінің сызбаларын жинадық, мұнай тасымалын қадағаладық, оқуды тренажер-симуляторлардың көмегімен өткіздік. «ҚазТрансОйл» АҚ-ның әрбір жұмыскері бізге әрдайым көмектесуге дайын болғаны қуантады. Сондай-ақ компания ақпараттың қауіпсіздігін мұқият қадағалайды. Компьютердегі жұмыскерлердің деректері әрдайым қорғалады. Жеке өзім электронды поштаға келетін «спам» хабарламаларды ашудың қажеті жоқ екенін білдім, себебі ол қауіпті болуы мүмкін, деді – Қазақ-Британ техникалық университетінің 4-курс студенті Аяжан Бейсенбаева.
Жастардың компания жұмыскерлері сияқты қоршаған ортаға ұқыпты қарауы – маңызды факторлардың бірі.
– Мысалы, практикадан өту кезінде біз «ҚазТрансОйл» АҚ-ның барлық жұмыскері сияқты тұрмыстық қалдықтарды сұрыптауға қатыстық. Мұны істеу өте оңай болды, өйткені әр қабатта қоқысты бөлек жинауға арналған сауыттар бар. Сонымен қатар компания жұмыскерлері қағазды үнемді жұмсайды және әр қабатта орналасқан ортақ принтерлерді пайдаланады. Мұның барлығы «ҚазТрансОйл» АҚ ұстанатын «Жасыл» кеңсе ережелеріне сәйкес келеді, – деді Satbayev University 4-курс студенті Сұлтан Жұмағұл.
Тағылымдамадан өтушілер компанияның қоғамдық өміріне белсенді қатысты. Жастар еңбек қауіпсіздігі және еңбекті қорғау саласындағы «Алтын ережеге» қанық болғаны соншалық, практикадан өту аяқталғаннан кейін «ҚазТрансОйл» АҚ әлеуметтік желілердегі ресми парақшасында жариялаған роликтер сериясын дайындады.
– Шығармашыл жастардың біздің компаниямыздағы жұмысқа басқа қырынан қарағаны тамаша. Олармен әңгіме барысында қолданбалы білімдерден басқа, мобилография және SMM сияқты қажетті дағдылары бар екенін білдік. Қарқынды дамып келе жатқан компания ретінде біз жаңа ұсыныстарға ашықпыз және бұл практика студенттердің «ҚазТрансОйл» АҚ-на өздерін көрсетуге үлкен мүмкіндік берді. Мысалы, практиканттар «Компания жұмыскерлерімен бір күн» айдарын ұсынды, онда түрлі кәсіп өкілдері өз қызметтері туралы әңгімелеген. Бізге бұл идея ұнады, – деді «ҚазТрансОйл» АҚ жұртшылықпен байланыс және ішкі коммуникациялар департаментінің директоры Гүлнар Бисаринова.
Ақы төленетін іс-тәжірибеден өткен студенттердің алған білімдері оларды Қазақстанның магистралды мұнай құбыры бойынша ұлттық оператордың жұмыскерлері болуға ынталандырады және елдің мұнай тасымалдау саласын дамытуға ықпал етуге мүмкіндік береді.
Меруерт ШУКУЕВА